तीन करोडभन्दा बढीको घरजग्गा कारोबारका लागि अब इजाजतपत्र अनिवार्य

काठमाडौं । अबदेखि तीन करोड रूपैयाँभन्दा बढीको घरजग्गा कारोबार गर्न चाहने कुनै पनि फर्म, कम्पनी वा संस्थाले अनिवार्य रूपमा इजाजतपत्र लिनुपर्ने भएको छ ।

भूमि व्यवस्था, सहकारी तथा गरिबी निवारण मन्त्रालयअन्तर्गतको भूमि व्यवस्थापन तथा अभिलेख विभागले बिहीबार सार्वजनिक सूचना जारी गर्दै घरजग्गा कारोबारको इजाजतपत्र (लाइसेन्स)का लागि दरखास्त आह्वान गरेको हो ।

विभागका अनुसार असोज २७ गते नेपाल राजपत्रमा प्रकाशित सूचनाअनुसार महानगरपालिका र उपमहानगरपालिका क्षेत्रलाई कार्यक्षेत्र घोषणा गरिएको छ । सो व्यवस्था अनुसार अब एक पटकमा तीन करोड रूपैयाँभन्दा बढीको घरजग्गा कारोबार गर्न इच्छुक फर्म, कम्पनी वा संस्थाले ३० दिनभित्र अनलाइनमार्फत आवेदन दिनुपर्नेछ ।

आवेदन दिन इच्छुकहरूले विभागको वेबसाइटमार्फत मालपोत नियमावली, २०३६ (आठौँ संशोधन २०८२) को अनुसूची–८ मा उल्लेखित कागजात स्क्यान गरी सोही ढाँचामा पेश गर्नुपर्नेछ ।

विभागले यो व्यवस्था घरजग्गा कारोबारमा पारदर्शिता, उत्तरदायित्व र नियमन सुनिश्चित गर्नका लागि लागू गरिएको स्पष्ट गरेको छ ।