ग्वार्को ‘फ्लाईओभर’ आजदेखि सञ्चालनमा, प्रधानमन्त्री ओलीले उद्घाटन गर्दै

काठमाडौं । ललितपुरको ग्वार्को चोकमा निर्माण गरिएको देशकै पहिलो ‘फ्लाईओभर’ आज (शुक्रबार)देखि औपचारिक रूपमा सञ्चालनमा आउँदैछ । प्रधानमन्त्री केपी शर्मा ओलीले उक्त ओभरपास उद्घाटन गर्ने कार्यक्रम तय भएको छ ।

राजधानीको एक अत्यधिक व्यस्त चोक ग्वार्कोमा यो परियोजना धेरै समयदेखि प्रतीक्षित थियो । निर्माण अवधि पटकपटक लम्बिँदै आएको यो ओभरपास अन्ततः पूर्णता पाएको हो ।

सडक विभागअन्तर्गतको गुणस्तर अनुसन्धान तथा विकास केन्द्रले ग्वार्को ओभरपास आयोजना अगाडि बढाएको थियो । केन्द्रले २०७८ फागुन १२ गते आशिष–समानान्तर रेलिगेर जेभी निर्माण कम्पनीसँग दुई वर्षभित्र निर्माण सक्ने गरी ठेक्का सम्झौता गरेको थियो ।

तर तोकिएको म्यादमा काम नसकिएपछि परियोजनाको अवधि दुईपटक थपियो । दोस्रो म्याद २०८१ साल पुस ८ गते सकिएको हो । निर्माण अवधिमा उत्पन्न समस्या र अवरोधका कारण केही समय कामसमेत ठप्प हुन पुगेको थियो ।

डिजाइन र संरचना
ग्वार्को ओभरपासको कुल लम्बाइ ५७६.२ मिटर रहेको छ । ग्वार्को चोकदेखि लगनखेलतर्फ ३२० मिटर र सातदोबाटोतर्फ १८५ मिटर लामो र्याम्पसहितको ओभरपासमा बीचमा रहेको पुल खण्डको लम्बाइ ३६.२ मिटर छ ।

फ्लाईओभरको चौडाइ १६.४ मिटर रहेको छ, जसमा चार लेनको सवारी आवागमन सम्भव हुनेछ । दुबैतर्फ कालोपत्र गरिएको र्याम्पको उचाइ १०.२ मिटर रहेको छ ।

लागतमा उल्लेख्य वृद्धि

परियोजनाको प्रारम्भिक सम्झौतामा लागत करिब १७ करोड ६ लाख रुपैयाँ थियो । तर म्याद थपिँदै जाँदा र विभिन्न ढिलाइका कारण कुल लागत ३१ करोड ४६ लाख नाघेको केन्द्रका प्रवक्ता प्रदीप भण्डारीले जानकारी दिए ।

उनका अनुसार ईपीसी मोडेलमा गरिएको यो ठेक्का सम्झौताअनुसार डिजाइन र निर्माणको सम्पूर्ण जिम्मेवारी निर्माण कम्पनीले लिएको हो । सम्झौता बमोजिम निर्माण सम्पन्न भइसकेपछि पाँच वर्षभित्र निर्माण कार्यमा र १० वर्षभित्र डिजाइनमा त्रुटि देखिएमा निर्माण कम्पनीले त्यसको जिम्मेवारी लिनुपर्ने व्यवस्था छ ।