निर्वाचन तयारीका लागि छलफल गर्न प्रधानमन्त्रीको सात दललाई पत्र

काठमाडौं । प्रधानमन्त्री सुशीला कार्कीले विघटित प्रतिनिधिसभामा रहेका सात राजनीतिक दललाई आगामी फागुन २१ गते तय गरिएको निर्वाचनबारे छलफलका लागि बोलाएकी छन् ।

उनकी प्रेस संयोजक राम रावलका अनुसार दलहरूलाई कात्तिक ४ गते (भोलि) साँझ ४ बजे प्रधानमन्त्री निवास बालुवाटारमा उपस्थित हुन पत्राचारमार्फत आग्रह गरिएको छ ।

छलफलमा प्रत्येक दलबाट दुई जना उच्चस्तरीय प्रतिनिधि सहभागी गराउन अनुरोध गरिएको छ । वार्ताका लागि आमन्त्रण गरिएका दलहरूमा नेपाली कांग्रेस, नेकपा (एमाले), नेकपा (माओवादी केन्द्र), राष्ट्रिय स्वतन्त्र पार्टी, राष्ट्रिय प्रजातन्त्र पार्टी, जनमत पार्टी र नागरिक उन्मुक्ति पार्टी सामेल छन् ।

निर्वाचनको तयारी र आवश्यक समन्वयका विषयमा छलफल गर्ने उद्देश्यले प्रधानमन्त्रीले यो पहल अघि बढाएकी बताइएको छ ।