एकीकृत समाजवादीमा गाभिँदै वामदेव गौतमको राष्ट्रिय एकता अभियान, आज एकता घोषणा हुने

काठमाडौं । नेपाल कम्युनिस्ट पार्टी (एकीकृत समाजवादी) र वामदेव गौतम नेतृत्वको नेकपा राष्ट्रिय एकता अभियानबीच आज औपचारिक एकीकरण घोषणा हुने भएको छ । गत शुक्रबार गौतम र एकीकृत समाजवादी अध्यक्ष माधवकुमार नेपालबीच भएको सहमतिपछि एकता प्रक्रिया अन्तिम चरणमा पुगेको हो ।

सहमति अनुसार, वामदेव गौतमलाई एकीकृत समाजवादी पार्टीमा तेस्रो वरियताको वरिष्ठ नेताको रुपमा स्थान दिइनेछ । वर्तमान संरचनाअनुसार पार्टीमा अध्यक्ष माधव नेपाल पहिलो, झलनाथ खनाल दोस्रो र अब गौतम तेस्रो वरियतामा रहनेछन् ।

पाँच वर्षअगाडि नेकपा विभाजन भएर एमाले र माओवादी छुट्टिँदा गौतम कुनै पनि खेमामा नगई अलग्गै राष्ट्रिय एकता अभियान सञ्चालन गर्दै आएका थिए । लामो समय अलग्गै अभियान चलाएका गौतम अन्ततः माधव नेपाल नेतृत्वको समाजवादी पार्टीमा मिसिन लागेका हुन् ।

यसअघि पनि गौतम समाजवादीमा प्रवेश गर्ने प्रयासमा थिए । तर, उनले सो पार्टीमा प्रवेश गर्न खोज्दा मागेको पदमा सहमति नजुटेपछि एमालेसँग समेत वार्ता गरेका थिए । एमाले अध्यक्ष केपी शर्मा ओलीले पनि उनलाई पार्टीमा भित्र्याउने इच्छा देखाए तापनि अन्तिम निर्णय पार्टीको विधान महाधिवेशनले गर्ने बताएका थिए ।

तर, एमाले सचिवालयले ‘राष्ट्रिय एकता अभियानसँग सहकार्य गर्ने’ मात्र निर्णय गरेपछि गौतमको एमाले प्रवेश निष्क्रिय भयो । २०७८ मा एमाले विभाजन भएपछि गौतम ओलीप्रति असन्तुष्ट हुँदै पार्टी परित्याग गरेका थिए । त्यस क्रममा माधव नेपालले नयाँ पार्टी गठन गर्दा पनि उनी अलग्गै बसेका थिए । नेकपा एकता कालमा प्रचण्ड–ओली विवाद उत्कर्षमा पुगेपछि गौतम प्रचण्ड र माधव पक्षमा झुकेका थिए ।

अब भने, लामो समयदेखि अलग्गै रहेको राष्ट्रिय एकता अभियान औपचारिक रूपमा एकीकृत समाजवादीमा समाहित हुँदैछ ।