गुरुङले जितिन कराँते प्रिमियर लिगमा नेपालका लागि ऐतिहासिक काँस्य पदक

काठमाडौं । नेपाली कराँते खेलाडी एरिका गुरुङले कराँते–१ प्रिमियर लिगमा नेपालका लागि पहिलोपटक पदक जित्दै ऐतिहासिक उपलब्धि हात पार्न सफल भएकी छिन् ।

मोरक्कोको रवातमा आइतबार राति सम्पन्न प्रतियोगितामा महिला ६८ केजी भन्दा माथिको तौल समूह अन्तर्गत एरिकाले फ्रान्सकी पिए क्लेमेन्सलाई ६–२ को अंकले पराजित गर्दै काँस्य पदक सुनिश्चित गरेकी हुन् । क्लेमेन्स प्रिमियर लिगको वरियतामा २० औँ स्थानमा रहेको खेलाडी थिइन् ।

यो नेपालले कराँते–१ प्रिमियर लिगमा जितेको पहिलो पदक हो। एरिका यस प्रतियोगितामा पहिलोपटक सहभागी भएकी थिइन् ।

विश्व कराँते महासंघद्वारा चयन गरिएका ३२ उत्कृष्ट खेलाडीहरूमध्ये एरिकाले पुल ६ मा टर्कीकी जेना गाबालासँग २–२ को बराबरी गरेकी थिइन् भने इटालीकी क्लिओ फेराकुतीलाई ३–१ ले पराजित गरेकी थिइन् ।

त्यस्तै, साइप्रसकी जिआमुकी ठेओदोसियासँग १–१ को खेल बराबरीमा टुंगिएको थियो । तर स्पेनकी मारिया टोरेस गार्सियासँगको ५–५ को बराबरी खेलमा अंकका आधारमा एरिका पछि परिन् ।

सेमिफाइनलमा टोरेससँग पराजित भएपछि एरिकाले काँस्य पदकका लागि प्रतिस्पर्धा गरेकी हुन् । टोरेसले भने फाइनलमा इंग्ल्यान्डकी रोसेल वाल्टर्सलाई ४–२ ले हराउँदै स्वर्ण पदक जितिन् ।