१४औँ साग चैत २०–२८ मा पाकिस्तानमा हुने

काठमाडौं । १४औँ दक्षिण एसियाली खेलकुद (साग) आगामी २०८३ साल चैत २० देखि २८ गतेसम्म पाकिस्तानमा आयोजना हुने भएको छ ।

पाकिस्तानको इस्लामाबादमा बसेको दक्षिण एसियाली ओलम्पिक काउन्सिल (एसएओसी) को बैठकले प्रतियोगिताको मिति तय गर्दै आयोजनाको औपचारिक निर्णय गरेको हो । प्रतियोगितामा आयोजक पाकिस्तानसहित नेपाल, भारत, बंगलादेश, भुटान, श्रीलंका र मालदिभ्स गरी सात राष्ट्रको सहभागिता रहनेछ ।

यस संस्करणमा २८ वटा खेल समावेश गरिनेछन् । दक्षिण एसियाली खेलकुद प्रत्येक चार वर्षमा आयोजना हुने भए पनि २०१९ मा नेपालमा सम्पन्न भएको १३औँ सागपछि भारत–पाकिस्तानबीचको राजनीतिक तनावका कारण १४औँ संस्करण लामो समयदेखि स्थगित हुँदै आएको थियो ।

आयोजनाको तयारीसम्बन्धी बैठकमा नेपाल ओलम्पिक कमिटी (एनओसी) का अध्यक्ष जीवनराम श्रेष्ठ, उपाध्यक्ष चतुरानन्द राजवैद्य तथा राष्ट्रिय खेलकुद परिषद् (राखेप) की सदस्य सिक्का सुवाल श्रेष्ठ सहभागी छन् ।

एसएओसीको केन्द्रीय समिति बैठकमा एनओसीका पदाधिकारीले नेपालको ओलम्पिक कमिटीको प्रतिनिधित्व गरेका छन् भने राखेप सदस्य श्रेष्ठले सरकारको प्रतिनिधित्व गरिरहेकी छन् । भोलिसम्म सञ्चालन हुने बैठकमा साग २०२७ को तयारी, प्राविधिक व्यवस्थापन र अन्य महत्वपूर्ण एजेन्डामाथि छलफल जारी रहने जनाइएको छ ।