भुर्तेलको विस्फोटक शतकमा चीनमाथि नेपालको २२१ रनको ऐतिहासिक जित

काठमाडौं । सिंगापुरमा जारी एसियाली खेलकुद क्रिकेट छनोटअन्तर्गत समूह चरणको पहिलो खेलमा नेपालले चीनलाई २२१ रनको विशाल अन्तरले पराजित गर्दै प्रतियोगितामा शानदार सुरुआत गरेको छ ।

आइतबार बिहान सिंगापुर नेसनल क्रिकेट स्टेडियममा भएको खेलमा नेपालले प्रस्तुत गरेको ३१४ रनको चुनौतीपूर्ण लक्ष्य पछ्याएको चीन १९.२ ओभरमा मात्र ९२ रन बनाएर अलआउट भयो । नेपालका बलरहरूले सुरुदेखि नै दबाब सिर्जना गर्दै चीनलाई खेलमा फर्किने कुनै अवसर दिएनन् ।

चीनलाई सस्तैमा समेट्ने क्रममा कुशल मल्लले १.२ ओभरमा एक मेडनसहित ३ विकेट लिए । सोमपाल कामी र सन्दीप लामिछानेले समान २–२ विकेट हात पारे भने नन्दन यादवले १ विकेट लिए । चीनका लागि सेनजियान झेङले ३१ रन बनाउँदै केही प्रतिरोध गरे पनि टोलीलाई ठूलो हारबाट जोगाउन सकेनन् ।

यसअघि टस हारेर ब्याटिङको निम्तो पाएको नेपालले निर्धारित २० ओभरमा २ विकेट गुमाएर ३१३ रनको विशाल स्कोर खडा गरेको थियो । यो नेपालले टी–२० अन्तर्राष्ट्रिय क्रिकेटमा बनाएको दोस्रो ठूलो योगफल हो ।

नेपालको इनिङ्समा ओपनर कुशल भुर्तेल चम्किए । उनले मात्र ४३ बलमा ५ चौका र १६ छक्काको मद्दतले १२९ रनको विस्फोटक इनिङ्स खेले । भुर्तेलले ३५ बलमै शतक पूरा गर्दै टी–२० अन्तर्राष्ट्रियमा नेपाली ब्याटरद्वारा बनाइएको उत्कृष्ट इनिङ्समध्ये एक प्रस्तुत गरे ।

भुर्तेल र कुशल मल्लबीच दोस्रो विकेटका लागि १७५ रनको साझेदारी भयो, जुन नेपालका लागि दोस्रो विकेटमा भएको नयाँ कीर्तिमानी साझेदारी हो । यसअघि सन् २०१९ मा पारस खड्का र आरिफ शेखले सिंगापुरविरुद्ध १४५ रनको अविजित साझेदारी गरेका थिए ।

अविजित रहेका कुशल मल्लले ४७ बलमा ९५ रन बनाए भने कप्तान रोहित पौडेलले १९ बलमै ६९ रनको आक्रामक इनिङ्स खेल्दै नेपालको स्कोरलाई ३०० रन पार पुर्‍याए ।

यस खेलसँगै कुशल भुर्तेल नेपालका लागि टी–२० अन्तर्राष्ट्रिय क्रिकेटमा सर्वाधिक छक्का प्रहार गर्ने खेलाडी बनेका छन् । उनले ७७ खेलमा ९९ छक्का पूरा गरेका छन् । यसअघि यो कीर्तिमान दीपेन्द्रसिंह ऐरीको नाममा रहेको थियो, जसले ८९ छक्का प्रहार गरेका थिए ।

नेपालले प्रतियोगिताको सुरुआती खेलमै ब्याटिङ र बलिङ दुवै विभागमा उत्कृष्ट प्रदर्शन गर्दै उपाधि दाबेदारीलाई बलियो बनाएको छ ।

एकै ओभरमा भुर्तेलको ६ छक्का
नेपाली ओपनर कुशल भुर्तेलले चीनविरुद्धको खेलमा अविश्वसनीय ब्याटिङ प्रदर्शन गर्दै एकै ओभरमा लगातार ६ छक्का प्रहार गरेका छन् ।

नेपालको इनिङ्सको नवौं ओभरमा बलिङ गर्न आएका चेन झुउमाथि भुर्तेल पूर्ण रूपमा हाबी बने। उनले ओभरका सबै ६ वैध बललाई सीमारेखापार पठाउँदै लगातार ६ छक्का प्रहार गरे ।

उक्त ओभरमा एक वाइड बलसमेत भएकाले नेपालले कुल ३७ रन जोड्न सफल भयो । भुर्तेलको यो आक्रामक प्रदर्शनले नेपाली समर्थकलाई उत्साहित बनाउनुका साथै चीनका बलरहरूलाई दबाबमा पार्यो ।

भुर्तेलको विस्फोटक ब्याटिङकै बलमा नेपालले विशाल स्कोरतर्फ लय समातेको थियो ।