ब्रुनो फर्नान्डेजको अन्तिम क्षणको गोलमा युनाइटेडको जित

काठमाडौं । कप्तान ब्रुनो फर्नान्डेजको पेनाल्टी गोलमा म्यानचेस्टर युनाइटेडले इङ्लिस प्रिमियर लिगमा महत्वपूर्ण जित हात पारेको छ । शनिबार राति ओल्ड ट्राफोर्डमा भएको खेलमा युनाइटेडले बर्नलीमाथि ३–२ को संघर्षपूर्ण जित दर्ता गर्‍यो ।

खेलको २७औँ मिनेटमा बर्नलीका कुलेनले आत्मघाति गोल गर्दा युनाइटेडले सुरुवाती अग्रता लिएको थियो । तर दोस्रो हाफमा खेल रोमाञ्चक बन्दै गयो ।

५५औँ मिनेटमा लाइन फोस्टरले बर्नलीका लागि बराबरी गोल गरे । त्यसपछि ५७औँ मिनेटमै ब्रायन एमबेउमोले गोल गर्दै युनाइटेडलाई पुनः अगाडि ल्याए । तर ६६ औँ मिनेटमा जैडन एन्थोनीले गोल गर्दै बर्नलीलाई फेरि बराबरीमा फर्काए ।

खेलमा थप गरिएको सातौँ मिनेटमा युनाइटेडले पेनाल्टी पायो । कप्तान फर्नान्डेजले शान्त रूपमा गोल गर्दै टिमलाई लिगको पहिलो जित दिलाए ।

त्यस्तै गएराति नै भएको अर्को खेलमा चेल्सीले फुलहामलाई २–० ले हरायो । स्ट्यामफोर्ड ब्रिजमा जोआओ पेड्रो र इन्जो फर्नान्डेजले गोल गरे । लिगमा अपराजित रहेको चेल्सी ७ अंकसहित शीर्ष स्थानमा उक्लिएको छ ।

अन्य खेलमा सन्डरल्यान्डले ब्रेन्टफोर्डलाई २–१ ले पराजित गर्‍यो भने एभर्टनले वुल्भ्सलाई ३–२ ले हरायो ।

यस्तै, वर्नमाउनले टोटनह्यामलाई १–० ले हराउँदा लिड्स र न्युक्यासल गोलरहित बराबरीमा रोकिए ।