नेपालको सशक्त बलिङ प्रदर्शन, सिंगापुरलाई १३५ रनमै समेट्यो

काठमाडौं । सिंगापुरमा जारी एसीसी यु–१६ इस्ट जोन कप क्रिकेट प्रतियोगिताको पहिलो खेलमा नेपालले उत्कृष्ट बलिङ प्रदर्शन गर्दै सिंगापुरलाई १३५ रनमै सीमित पारेको छ । नेपालले अब जितका लागि १३६ रनको लक्ष्य पाएको छ ।

नेपालका कप्तान विपिनप्रसाद शर्माले प्रेरणादायी कप्तानी गर्दै चार महत्वपूर्ण विकेट लिएपछि सिंगापुरको ब्याटिङ लस्किएको हो । ६५ रनको अवस्थामा दुई विकेट मात्र गुमाएको सिंगापुर, शर्माको आक्रमणपछिको ७० रनमै ८ विकेट गुमाउँदै ३५.१ ओभरमा समेटियो ।

सिंगापुरका लागि कप्तान रियान नाइकले टिमलाई संकटबाट जोगाउने भरपुर प्रयास गरे । चौथो नम्बरमा ब्याटिङ गर्न आएका उनले ५३ बलमा ५ चौका र १ छक्का प्रहार गर्दै ५३ रनको जिम्मेवार पारी खेले । सुरुआती चरणमा आहान भुथान्दमले पनि आक्रामक ब्याटिङ गर्दै ३२ बलमा ३८ रन जोडेका थिए। यी दुई खेलाडीबाहेक अन्य ब्याट्सम्यान भने नेपाली बलिङ अगाडि उभिन सकेनन् ।

नेपालका लागि सचित भट्टले ६.१ ओभरको स्पेलमा केवल १८ रन खर्चेर तीन विकेट लिए । उनले सिंगापुरको तल्लो क्रम ध्वस्त पार्न भूमिका खेले । अभय यादव र शुभम खनालले एक–एक विकेट लिएर बलिङ आक्रमणलाई मजबुत बनाए ।

कप्तान शर्माले ७ ओभरमा ३४ रन खर्चेर ४ विकेट हात पार्दा, आफ्नो कप्तानी क्षमतासँगै बलिङ प्रभाव पनि देखाए। उनले मिडल अर्डर नै ध्वस्त पार्दै खेलमा नेपालको पकड बलियो बनाएका थिए ।

अब नेपालले जितका लागि १३६ रनको लक्ष्य पछ्याउनेछ । टिमका ब्याट्सम्यानले यदि संयमता र जिम्मेवारीपूर्वक खेल प्रस्तुत गरेमा प्रतियोगिताको सुरुआत विजयी ढंगबाट हुने विश्वास गरिएको छ ।