मेस्सी चम्किँदा इन्टर मियामीको नयाँ रंगशालामा पहिलो जित

फ्लोरिडा । लियोनेल मेस्सीको प्रेरणादायी प्रदर्शनमा इन्टर मियामीले मेजर लिग सकर (एमएलएस) अन्तर्गत पोर्टल्यान्ड टिम्बर्सलाई २–० ले पराजित गरेको छ । यो जितसँगै मियामीले आफ्नो नयाँ घरेलु मैदानमा पहिलो विजय दर्ता गरेको हो ।

अप्रिलमा २६ हजार ७ सय दर्शक अट्ने नयाँ रंगशालामा सरेपछि टोलीले यसअघि तीन बराबरी र एक हार बेहोरेको थियो । घरेलु मैदानमा लगातार दबाब झेलिरहेको मियामीलाई कप्तान मेस्सीले उत्कृष्ट प्रदर्शनमार्फत राहत दिलाए ।

खेलको सुरुवातदेखि नै आक्रामक देखिएका मेस्सीले बायाँ खुट्टाको शक्तिशाली प्रहारमार्फत टोलीलाई अग्रता दिलाए । यो उनको जारी एमएलएस सिजनको १२औँ गोल हो ।

पहिलो हाफ सकिनुअघि मेस्सीले पेनाल्टी क्षेत्रभित्र उत्कृष्ट पास निकाल्दै जर्मेन बेर्टेरामेलाई गोलको अवसर सिर्जना गरिदिए । बेर्टेरामेले त्यसलाई सदुपयोग गर्दै मियामीको अग्रता दोब्बर बनाए ।

३८ वर्षीय मेस्सी पछिल्ला चार खेलमा पाँच गोल र छ असिस्ट गर्दै उच्च लयमा रहेका छन् । उनको निरन्तर उत्कृष्ट प्रदर्शनले मियामीलाई उपाधि दौडमा बलियो बनाएको छ ।

यस जितसँगै प्रशिक्षक गुइलेर्मो होयोजको टोली १४ खेलबाट २८ अंक जोड्दै इस्टर्न कन्फरेन्सको दोस्रो स्थानमा पुगेको छ । मियामी शीर्ष स्थानको न्यासमिल एफसीभन्दा दुई अंकले मात्र पछि रहेको छ ।

साविक विजेता मियामीले विश्वकप विश्रामअघि आफ्नो अन्तिम खेल आगामी आइतबार फिलाडेल्फिया युनियनविरुद्ध खेल्नेछ । (एजेन्सी)