एमएफएन बान्टमवेट च्याम्पियन रवीन्द्र ढाँटलाई सरकारले पाँच लाख दिने

काठमाडौं । म्याट्रिक्स फाइट नाइट (एमएफएन) १७ मा बान्टमवेट च्याम्पियन बनेका रवीन्द्र ढाँटलाई सरकारले पाँच लाख रुपैयाँको पुरस्कार दिने निर्णय गरेको छ ।

प्रधानमन्त्री केपी शर्मा ओलीले बुधबार फेसबुकमार्फत मन्त्रिपरिषद्को निर्णय सार्वजनिक गर्दै, ढाँटलाई प्रोत्साहनस्वरूप पाँच लाख रुपैयाँ प्रदान गरिने बताए । साथै, उनको प्रशिक्षकलाई दुई लाख रुपैयाँ दिने पनि निर्णय भएको छ ।

नेपाललाई पहिलो पटक यो उपाधि दिलाउन सफल भएकोमा प्रधानमन्त्री ओलीले ढाँटलाई पुनः बधाई दिए ।

एक साताअघि सम्पन्न प्रतियोगितामा ढाँटले भारतीय फाइटर चोङरेङ्ग कोरेनलाई पराजित गर्दै बान्टमवेट च्याम्पियनसिपको टाइटल जितेका थिए । यससँगै उनी एमएफएन इतिहासमा च्याम्पियन बन्ने पहिलो नेपाली फाइटर बनेका छन् ।