एनपीएलमा काठमान्डु गुर्खाजको पुनरागमन जित, लुम्बिनी लायन्स फेरि पराजित

काठमाडौं । नेपाल प्रिमियर लिग (एलपीएल) मा काठमान्डु गुर्खाजले आफ्नो चौथो खेलमा पुनरागमन जित दर्ता गरेको छ । लुम्बिनी लायन्सका ब्याटरले महत्वपूर्ण क्षणमा धैर्य गुमाएपछि काठमान्डुले खेलमा २२ रनले प्रभावशाली जित दर्ता गरेको हो ।

१५८ रनको चुनौतीपूर्ण लक्ष्य पछ्याएको लुम्बिनी १३५ रनमै समेटिँदा उसले लगातार दोस्रो हार बेहोर्‍यो । मंगलबार कीर्तिपुरस्थित त्रिवि क्रिकेट मैदानमा भएको खेलमा काठमान्डुले हारको शृङ्खलाबाट बाहिरिँदै पुनः ‘कमब्याक’ गर्‍यो । पहिलो खेलमा जनकपुर बोल्ट्सलाई हराए पनि विराटनगर किंग्स र सुदूरपश्चिम रोयल्सविरुद्ध पराजित भएको काठमान्डुले चौथो खेलमा लुम्बिनीलाई रोक्दै ‘प्लेअफ’को सम्भावनालाई जीवित राखेको छ ।

अंक तालिकामा अहिले प्रतिस्पर्धा कडा बन्दै गएको छ । सात खेलको लिग चरण पछाडि रहने चार टोली प्रतियोगिताबाट बाहिरिनेछन् । दुईदेखि चार खेलसम्म पाँच टोली दुई–दुई हार झेलेका छन् । पोखरा र जनकपुर अझै जितविहीन छन् । काठमान्डुले चार खेलमा दुई जित र दुई हार दर्ता गरेको छ भने लुम्बिनी र कर्णालीले तीनमध्ये एक जित मात्रै निकाल्न सकेका छन् । चितवन एक जित–एक हारमा छ र विराटनगर तथा सुदूरपश्चिम भने तेस्रो खेलसम्म अपराजित छन् ।

काठमान्डुका लागि ब्याटिङमा शेर मल्लले १८ बलमा तीन छक्कासहित २७ रन जोडे । दिलिप नाथले २५ रन, डी आरसी सर्टले २२ रन र कप्तान रोहित पौडेल तथा गुल्वदिन नैबले समान ११ रनको योगदान दिए । लुम्बिनीका विदेशी खेलाडीहरू आज चल्न सकेनन् । सन्दीप जोरा ७, जोनाथन स्मिथ ८ र रुबेन ट्रम्पलम्यान ५ रनमै आउट भए ।
काठमान्डुका लागि मिलिन्द कुमार र जेरहार्ड इरसमसले दुई–दुई विकेट लिए भने रसिद खान, साहब आलम, करण केसी र सन्तोष यादवले पनि एक–एक विकेट हात पारे ।

यसअघि टस जितेर काठमान्डुलाई ब्याटिङ गर्न दिएको लुम्बिनीले ८ विकेट गुमाएर १५७ रन बनायो । काठमान्डुका कप्तान करण केसी ११ बलमा एक चौका र चार छक्का प्रहार गर्दै ३४ रनमा अविजित रहे । ओपनर आकाश त्रिपाठीले ३६ बलमा तीन चौकासहित ३२ रन बनाए । सन्तोष यादवले १६ बलमा दुई छक्कासहित २६ रन थपे । मिलिन्द कुमार र इरसमसले समान १७ रन जोडे ।

बलिङतर्फ लुम्बिनीका रुबेन ट्रम्पलम्यान, शेर मल्ल, रोहित पौडेल र गुल्वदिन नैवले दुई–दुई विकेट प्राप्त गरे ।