देशभर बदली रहने, केही स्थानमा मध्यम वर्षाको सम्भावना

काठमाडौं । मनसुनको न्यून चापीय रेखा पूर्वी क्षेत्रमा औसत स्थानभन्दा दक्षिणतर्फ र पश्चिमी क्षेत्रमा औसत स्थानको आसपासमा सक्रिय रहेको मौसम पूर्वानुमान महाशाखाले जनाएको छ।

यसको प्रभावस्वरूप देशभर सामान्यतया आकाश बदली रहेको छ । कोशी, बागमती र गण्डकी प्रदेशका केही स्थानहरू तथा सुदूरपश्चिम प्रदेशका एक–दुई स्थानमा हल्का वर्षा भइरहेको छ ।

आज दिउँसो पनि देशभर सामान्य बदली रहनेछ । कर्णाली र सुदूरपश्चिम प्रदेशको तराई तथा पहाडी भूभागका केही स्थानहरूमा, बागमती र गण्डकीसहित अन्य पहाडी क्षेत्रमा थोरै स्थानहरूमा तथा तराईका एक–दुई स्थानमा मध्यम खालको वर्षा हुने सम्भावना छ ।

आज राति पनि देशभर सामान्य बदली रहनेछ । सबै प्रदेशका पहाडी भूभागका केही स्थानहरू र तराई भूभागका थोरै स्थानहरूमा मध्यम वर्षाको सम्भावना रहेको छ ।