१६ वर्षपछि स्पेन विश्वकप विजेता, अर्जेन्टिनाको लगातार दोस्रो उपाधि सपना चकनाचुर

काठमाडौं । स्पेनले फिफा विश्वकप २०२६ को उपाधि जित्दै १६ वर्षपछि फेरि विश्व फुटबलको सर्वोच्च शिखरमा आफूलाई उभ्याएको छ । अमेरिकाको न्युयोर्कस्थित न्यु जर्सी स्टेडियममा सम्पन्न रोमाञ्चक फाइनलमा स्पेनले साविक विजेता अर्जेन्टिनालाई १–० ले पराजित गर्दै दोस्रोपटक विश्वकप ट्रफी उचाल्यो ।

निर्धारित ९० मिनेटसम्म दुवै टोलीले गोलरहित बराबरी खेलेपछि खेल अतिरिक्त समयमा पुगेको थियो । त्यही अतिरिक्त समयको १०६औँ मिनेटमा फेरान टोरेसले निर्णायक गोल गर्दै स्पेनलाई ऐतिहासिक जित दिलाए । पेनाल्टी क्षेत्रभित्र उछिट्टिएको बललाई उनले बायाँ खुट्टाले शक्तिशाली प्रहार गर्दै क्रसबारको ठीक मुनिबाट जाली चुमाएका थिए ।

अर्जेन्टिनाले भने निर्धारित समयको अन्तिमतिर ठूलो धक्का बेहोर्नुपर्‍यो । मिडफिल्डर एन्जो फर्नान्डेजले दोस्रो पहेँलो कार्ड पाएपछि रातो कार्डसहित मैदान छाड्न बाध्य भए, जसका कारण टोली बाँकी समय १० खेलाडीमा सीमित रह्यो । त्यसको फाइदा उठाउँदै स्पेनले अतिरिक्त समयको सुरुवातमै गोल निकालेर उपाधि आफ्नो पक्षमा पार्‍यो ।

फाइनलभर स्पेनले बल नियन्त्रण र आक्रमणमा स्पष्ट वर्चस्व कायम राखेको थियो । अर्जेन्टिनाले केही अवसर सिर्जना गरे पनि स्पेनी रक्षापंक्तिलाई तोड्न सकेन ।

सन् २०१० पछि पहिलोपटक विश्वकप जितेको स्पेनले यस संस्करणमा असाधारण प्रदर्शन गर्दै आठ खेलमा जम्मा एक गोल मात्र खाएको कीर्तिमान पनि बनाएको छ । यो विश्वकप इतिहासमा कुनै पनि च्याम्पियन टोलीले प्रतियोगिताभर सबैभन्दा कम गोल खाएको नयाँ रेकर्ड हो ।

स्पेनको अपराजित यात्रा पनि जारी रहेको छ । टोली अहिले लगातार ३८ अन्तर्राष्ट्रिय खेलमा हारविहीन छ, जसमा २९ जित र ९ बराबरी समावेश छन् । यो कुनै पनि युरोपेली राष्ट्रले बनाएको सबैभन्दा लामो अपराजित श्रृंखला हो । यसअघि इटालीले ३७ खेलसम्म अपराजित रहने कीर्तिमान बनाएको थियो, जसलाई स्पेनले उछिनेको हो ।

यता, फाइनलमा पराजित भएपछि अर्जेन्टिनाको लगातार दोस्रो विश्वकप जित्ने लक्ष्य अधुरै रह्यो । सन् २०२२ को विश्वकप विजेता अर्जेन्टिनाले उपाधि रक्षा गर्ने प्रयास गरे पनि स्पेनको उत्कृष्ट प्रदर्शनका अगाडि सफल हुन सकेन ।