प्रत्यक्षतर्फको १५ जिल्लाका १८ क्षेत्रको मतपत्र छपाइ पूरा

काठमाडौं । आउँदो फागुन २१ गते हुने प्रतिनिधिसभा निर्वाचनका लागि प्रत्यक्षतर्फका १५ जिल्लाका १८ निर्वाचन क्षेत्रमा प्रयोग हुने मतपत्र छपाइको काम पूरा भएको छ ।

निर्वाचन आयोगका अनुसार जनक शिक्षा सामग्री केन्द्र, भक्तपुरमा जारी मतपत्र छपाइ अन्तर्गत डोल्पा, मुगु, जुम्ला, कालिकोट, हुम्ला, सल्यान र जाजरकोटका प्रत्यक्षतर्फका मतपत्र छापिसकिएको छ ।

यसैगरी, दैलेख निर्वाचन क्षेत्र नं १ र २, सुर्खेत क्षेत्र नं १ र २, रुकुमपश्चिम, बाजुरा तथा अछाम क्षेत्र नं १ र २, कैलाली क्षेत्र नं १, झापा क्षेत्र नं ५ र सुनसरी क्षेत्र नं १ का प्रत्यक्षतर्फका मतपत्र छपाइ पनि सम्पन्न भइसकेको आयोगले जनाएको छ ।

आयोगका अनुसार नमूना मतपत्रतर्फ १० लाख ९८ हजार २०० प्रति छपाइ भई सम्बन्धित निर्वाचन क्षेत्रमा पठाइसकिएको छ । त्यस्तै, समानुपातिकतर्फ कुल दुई करोड आठ लाख ३० हजार मतपत्रको छपाइ कार्य पनि पूरा भएको छ ।