गुण्डुमा सरे ओली, बालकोटको घर जलेपछि नयाँ ठेगानामा बसोबास

काठमाडौं । नेकपा एमालेका अध्यक्ष तथा निवर्तमान प्रधानमन्त्री केपी शर्मा ओली सैनिक ब्यारेकबाट बाहिरिएका छन् । जेन–जी आन्दोलन चर्किएपछि सुरक्षाको कारण देखाउँदै नेपाली सेनाले उनलाई अस्थायी रूपमा ब्यारेकमा राखेको थियो ।

गत भदौ २४ गते प्रधानमन्त्री पदबाट राजीनामा दिएपछि ओली ब्यारेकमै बस्दै आएका थिए । तर अब उनी भक्तपुरको गुण्डुमा सरेका छन् । सुरक्षा निकायका अनुसार ओली र उनको टोलीले गुण्डुमा भाडामा घर लिएको हो ।

ओलीको बालकोटस्थित निजी निवास जेन–जी आन्दोलनकारीले आगजनी गरेका कारण प्रयोगयोग्य छैन । घर पूर्ण रूपमा नष्ट भएपछि उनीलाई गुण्डु सारिएको जनाइएको छ ।

ओलीको नयाँ बसोबास व्यवस्थापनमा एमाले पोलिटब्युरो सदस्य महेश बस्नेत सक्रिय देखिएका छन् । बस्नेतले ओलीलाई ब्यारेकबाट बाहिर ल्याउने मात्र होइन, उनलाई सार्वजनिक रूपमा भव्य कार्यक्रममार्फत प्रस्तुत गर्ने तयारी पनि गरिरहेका छन् ।