‘एभरेष्ट म्यान’ शेर्पाको नयाँ इतिहास, ३२औँ पटक सगरमाथा शिखरमा

काठमाडौं । विश्वकै सर्वोच्च शिखर सगरमाथामा सबैभन्दा धेरैपटक आरोहण गर्ने कीर्तिमान कायम गरेका कामिरिता शेर्पाले फेरि नयाँ इतिहास रचेका छन् । उनले आइतबार बिहान १०ः१२ बजे ३२औँ पटक सफलतापूर्वक सगरमाथाको आरोहण गरेका हुन् ।

आरोहण व्यवस्थापन कम्पनी सेभेन समिट ट्रेक्सले कामिरिताले यस वर्षको वसन्तकालीन अभियानअन्तर्गत पुनः शिखर चुम्न सफल भएको जनाएको छ । उनको यो आरोहणसँगै आफ्नै नाममा रहेको विश्व कीर्तिमान थप मजबुत बनेको छ ।

५६ वर्षीय शेर्पा लामो समयदेखि हिमाल आरोहण क्षेत्रमा सक्रिय छन् । उनले पहिलोपटक सन् १९९४ मा सगरमाथा आरोहण गरेका थिए । त्यसयता उनले लगभग प्रत्येक वर्ष सगरमाथा चढ्दै आएका छन् । कठिन मौसम, जोखिमपूर्ण मार्ग र प्रतिकूल अवस्थाबीच पनि उनले निरन्तर सफलता हासिल गर्दै विश्व पर्वतारोहण क्षेत्रमा नेपाललाई चिनाएका छन् ।

‘एभरेष्ट म्यान’को उपनामले परिचित शेर्पाको अनुभव र साहसलाई विश्वभरका पर्वतारोहीहरूले प्रेरणाका रूपमा लिने गरेका छन् । उनी केवल कीर्तिमानी आरोही मात्र नभई नेपाली पर्वतारोहण क्षेत्रका एक प्रतीक व्यक्तित्वका रूपमा समेत स्थापित छन् ।

यसअघि पनि उनले आफ्नै कीर्तिमान पटक–पटक तोड्दै आएका छन् । पछिल्लो सफलतासँगै सगरमाथामा उनको प्रभुत्व अझ स्पष्ट बनेको छ । पर्यटन तथा पर्वतारोहण क्षेत्रसँग सम्बन्धित व्यक्तिहरूले कामिरिताको उपलब्धिलाई नेपालको गौरवसँग जोडेर प्रशंसा गरेका छन् ।