सुदन किरातीद्वारा प्रलोपा परित्याग, राजनीति भने निरन्तर गर्ने प्रतिबद्धता

काठमाडौं । पूर्वमन्त्री तथा प्रगतिशील लोकतान्त्रिक पार्टी (प्रलोपा) का नेता सुदन किरातीले पार्टी परित्याग गर्ने निर्णय सार्वजनिक गरेका छन् । बुधबार सामाजिक सञ्जालमार्फत उनले अब प्रलोपाको साधारण सदस्य समेत नरहने जानकारी दिएका हुन् ।

करिब पाँच महिनाको राजनीतिक यात्रापछि पार्टी छोड्ने निर्णय लिएको उल्लेख गर्दै किरातीले यस अवधिमा साथ र सहयोग गर्ने सबैप्रति आभार व्यक्त गरेका छन् । उनले आफूलाई मार्गदर्शन गर्ने नेताहरू, सहकार्य गर्ने साथीहरू तथा कर्मचारीहरूप्रति धन्यवाद ज्ञापन गरेका छन् ।

पार्टीसँगको औपचारिक सम्बन्ध अन्त्य भए पनि व्यक्तिगत सम्बन्ध भने यथावत् रहने विश्वास उनले व्यक्त गरेका छन् । यस अवधिमा प्राप्त अनुभवलाई अमूल्य सम्पत्तिका रूपमा आत्मसात गरेको पनि उनले बताएका छन् ।

प्रलोपा परित्याग गरेपछि पनि राजनीति भने निरन्तर जारी राख्ने किरातीको भनाइ छ । आगामी यात्रा चुनौतीपूर्ण हुन सक्ने स्वीकार्दै उनले देश र जनताको सेवाबाट पछि नहट्ने प्रतिबद्धता जनाएका छन् ।

जनताको विश्वास र सहिदहरूको अधूरो सपना आफ्नो मार्गदर्शक रहेको उल्लेख गर्दै उनले जुनसुकै परिस्थितिमा पनि समाज रूपान्तरणको अभियानमा निरन्तर अघि बढिरहने वाचा गरेका छन् ।