ईपीएस आवेदकलाई राहत, साउन १८ सम्म राहदानी आवेदन फाराम खुला रहने

काठमाडौं । दक्षिण कोरियाको रोजगार अनुमति प्रणाली (ईपीएस) अन्तर्गत आवेदन दिने सेवाग्राहीलाई सहज बनाउन राहदानी विभागले आगामी साउन १८ गते सोमबारसम्म राहदानी आवेदन फाराम खुला राख्ने निर्णय गरेको छ ।

विभागले सार्वजनिक बिदा परेका शनिबार र आइतबारलाई समेत मध्यनजर गर्दै आवेदन फाराम खुला राखिएको जनाएको छ । यसबाट ईपीएसका लागि राहदानी बनाउन चाहने सेवाग्राहीले थप समय पाउनेछन् ।

बिहीबार वैदेशिक रोजगार विभागले जारी गरेको प्रेस विज्ञप्तिअनुसार ईपीएस आवेदनको म्याद थप गरिएकाले त्यसलाई ध्यानमा राख्दै राहदानी विभागले पनि राहदानी आवेदन फाराम उपलब्ध गराउने अवधि लम्ब्याएको हो ।

यसअघि पनि ईपीएसका कारण राहदानी बनाउने सेवाग्राहीको अत्यधिक चाप देखिएपछि विभागले विशेष रूपमा आवेदन फाराम खुला गरेको थियो । विभागका अनुसार हाल उपलब्ध गराइएका फाराममार्फत आवेदन दिने सेवाग्राहीले आफूलाई तोकिएको मिति र समयमा विभागमा उपस्थित भई राहदानीसम्बन्धी सम्पूर्ण प्रक्रिया पूरा गर्नुपर्नेछ ।

राहदानी विभागले सेवाग्राहीलाई आवेदन फाराममा उल्लेख गरिएको समयतालिका पालना गर्न आग्रह गर्दै सेवा प्रवाहलाई थप व्यवस्थित, सहज र प्रभावकारी बनाउन यस्तो व्यवस्था गरिएको स्पष्ट पारेको छ ।