इरानमाथिको आक्रमणपछि राष्ट्रलाई सम्बोधन गर्दै ट्रम्पको चेतावनी र सेनाको प्रशंसा

वाशिङ्टन । इरानमाथिको पछिल्लो सैन्य आक्रमणपछि अमेरिकी राष्ट्रपति डोनाल्ड ट्रम्पले राष्ट्रको नाममा सम्बोधन गर्दै अमेरिकी सेनाको प्रशंसा गरेका छन् । उनले आक्रमणमा प्रत्यक्ष संलग्न अमेरिकी तथा इजरायली सैनिकहरूलाई ‘दुर्लभ वीरता’ प्रदर्शन गरेको भन्दै धन्यवाद दिएका हुन् ।

शनिबार राति गरिएको टेलिभिजन सम्बोधनमा ट्रम्पले अमेरिकी सेनाले ‘इतिहासमै नभएको’ किसिमको सटीक र शक्तिशाली कारबाही गरेको दाबी गरे । उनले भने, ‘यो रात अमेरिकी सेनाले जुन बहादुरी र दक्षता देखायो, त्यो आजसम्म संसारका कुनै सेनाले देखाएको छैन ।’ ट्रम्पले उक्त कारबाहीमा अमेरिकी सेनाको हवाई क्षमताको ‘अभूतपूर्व प्रयोग’ भएको उल्लेख गरे ।

उनले अमेरिकी सैनिक नेतृत्वकर्ता राजिन सेनसहित सम्पूर्ण सैन्य टोलिको खुलेर प्रशंसा गरे । साथै, यस आक्रमणमा सहकार्य गर्ने इजरायली सेनालाई पनि विशेष धन्यवाद दिँदै ट्रम्पले भने, ‘इजरायली सेनाले उल्लेखनीय काम गरिरहेको छ। उनीहरू हाम्रो सबैभन्दा नजिकको मित्र हुन् ।’

ट्रम्पले इरानको आणविक स्थापनामाथि भएको आक्रमणलाई ‘पूर्वचेतावनीसहितको सुरक्षा प्रतिक्रिया’ को संज्ञा दिएका छन् । उनका अनुसार इजरायलको भावी कारबाही तेहरानबाट आउने प्रतिक्रिया र आक्रामक गतिविधिमा निर्भर रहनेछ । ‘तेहरान शान्त रहन्छ भने क्षेत्रीय स्थायित्व सम्भव छ, तर उनीहरूले उक्साउने हो भने इजरायलकहाँ जवाफ दिन पर्याप्त सामर्थ्य छ,’ ट्रम्पको भनाइ थियो ।

इरानले पुष्टि गर्‍यो क्षति, तनाव थप चुलिने संकेत

इरानले भने यो आक्रमणलाई ‘अत्यन्तै उक्साहटपूर्ण’ भनी व्याख्या गर्दै आणविक केन्द्रमा क्षति पुगेको पुष्टि गरिसकेको छ । तेहरानस्थित सरकारी अधिकारीहरूका अनुसार अमेरिकी ड्रोन र मिसाइल आक्रमणले नातान्ज आणविक केन्द्रको एक भागमा गम्भीर क्षति पुर्‍याएको छ । यद्यपि, इरानले आफ्नो परमाणु कार्यक्रम निरन्तर जारी रहने जनाएको छ ।

विश्लेषकहरूका अनुसार यो घटना पश्चिम एसिया क्षेत्रमा तनाव अझै चर्किने सङ्केत हो । इजरायल र इरानबीचको तनावपूर्ण सम्बन्धमा पछिल्ला महिनाहरूमा आन्तरिक हिंसा र गुप्तचर गतिविधिका कारण बारम्बार सैन्य झडप देखिँदै आएका थिए ।

कूटनीतिक प्रयासहरू पन्छिँदै, सैन्य रणनीतिमा जोड

ट्रम्पले आफ्नो सम्बोधनमा कूटनीतिक समाधानको सम्भावनालाई खासै प्राथमिकता नदिएको देखिएको छ । बरु, उनले बल प्रयोगद्वारा प्रतिरोध गर्ने अमेरिकी नीतिलाई नै उचित ठहर्‍याउँदै थप कडा नीति अवलम्बन गर्नुपर्ने धारणा राखेका छन् ।

ट्रम्पको सम्बोधनसँगै अन्तर्राष्ट्रिय समुदायमा चिन्ता थपिएको छ । संयुक्त राष्ट्रसंघ, युरोपेली संघ लगायतका निकायहरूले शान्ति कायम राख्न दुबै पक्षलाई संयमता अपनाउन आह्वान गरेका छन् ।