रास्वपाका नवनिर्वाचित सांसदलाई अभिमुखीकरण सुरु, दुई दिनसम्म प्रशिक्षण

काठमाडौं । राष्ट्रिय स्वतन्त्र पार्टी (रास्वपा) का नवनिर्वाचित सांसदहरूका लागि अभिमुखीकरण कार्यक्रम सुरु भएको छ । ललितपुरस्थित एक होटलमा आयोजित कार्यक्रममा पार्टीका उपसभापतिद्वय डीपी अर्याल र डा. स्वर्णिम वाग्लेले घन्टी बजाएर उद्घाटन गरेका हुन् ।

कार्यक्रममा रास्वपाबाट नवनिर्वाचित सांसदहरूको सहभागिता रहेको छ । संसदीय अभ्यास, विधायन प्रक्रिया, नीति निर्माण, बजेट तथा कानुन निर्माणका विभिन्न चरणहरूबारे जानकारी दिने उद्देश्यले कार्यक्रम आयोजना गरिएको रास्वपाले जनाएको छ । साथै, निर्वाचन क्षेत्रमा जनतासँग प्रभावकारी सम्बन्ध कायम राख्ने उपायबारे पनि छलफल हुने बताइएको छ ।

रास्वपाका अनुसार अभिमुखीकरणमा नेपालको संवैधानिक व्यवस्था, संसद् सञ्चालन प्रणाली, सुशासन र पारदर्शिताका मापदण्ड, नीति विश्लेषण, जनप्रतिनिधिको आचरण तथा सार्वजनिक उत्तरदायित्व जस्ता विषय समेटिएका छन् । पार्टीको नीतिगत प्राथमिकता, रणनीतिक कार्यदिशा र संसद् भित्र तथा बाहिर समन्वय कसरी प्रभावकारी बनाउने भन्नेबारे पनि साझा धारणा विकास गरिनेछ ।

दुई दिनसम्म चल्ने कार्यक्रममा पार्टीका शीर्ष नेतासहित कानुनविद्, सञ्चार तथा प्रविधि क्षेत्रका विज्ञहरूले प्रशिक्षण दिने कार्यतालिका छ । सोही क्रममा डा. वाग्लेले देशको समसामयिक अवस्था, पार्टीको प्रतिबद्धता र सांसदको भूमिकाबारे प्रशिक्षण दिनेछन् ।

त्यसैगरी, पूर्वसचिव सुरेश अधिकारीले संसद्को संरचना र कार्यप्रणाली तथा सांसदका अधिकारबारे जानकारी दिनेछन् भने पूर्वकानुन सचिव तोयानाथ अधिकारीले संघीय संसद्मा कानुन निर्माण प्रक्रियामा सांसदको भूमिकाबारे प्रशिक्षण दिनेछन् ।

आईटी विज्ञ डा. दोभान राईले कृत्रिम बुद्धिमत्ता र एल्गोरिदमको लोकतन्त्र र सुशासनमा प्रभावबारे प्रस्तुत गर्नेछन् भने पूर्वसचिव डा. तोयानारायण ज्ञवालीले सरकार सञ्चालन, योजना तथा बजेट निर्माण प्रक्रियाबारे प्रशिक्षण दिनेछन् ।

फागुन २१ मा सम्पन्न निर्वाचनमा प्रत्यक्षतर्फ १२५ सिट जितेको रास्वपाले समानुपातिक प्रणालीमार्फत थप ५७ सिट हासिल गरेको छ ।

यस्तो छ प्रशिक्षण कार्यतालिका