मेस्सीको प्रदर्शनमा इन्टर मायामीलाई क्याम्पियोनेस कपको उपाधि

काठमाडौं । लियोनल मेस्सीको प्रभावशाली प्रदर्शनमा इन्टर मायामीले क्याम्पियोनेस कप २०२६ को उपाधि जितेको छ । फाइनलमा मेक्सिकोको बलियो क्लब क्रुज अजुललाई २–० गोलले पराजित गर्दै इन्टर मायामी च्याम्पियन बनेको हो ।

इन्टर मायामीको जितमा कप्तानसमेत रहेका मेस्सीले उत्कृष्ट प्रदर्शन गरे । उनले एक गोल गर्नुका साथै अर्को गोलका लागि असिस्ट प्रदान गर्दै टोलीलाई उपाधि दिलाउन निर्णायक भूमिका निर्वाह गरे ।

फाइनल खेलमा इन्टर मायामीका दुवै गोल हेडरमार्फत भएका थिए । पहिलो हाफमा लुइस स्वारेजको पासमा मेस्सीले हेडरमार्फत गोल गरेका थिए । त्यसपछि खेलको दोस्रो हाफको ८४औँ मिनेटमा मेस्सीको कर्नरमा क्यासिमेरोले गोल गर्दै टोलीको अग्रता दोब्बर बनाए ।

क्रुज अजुलले खेलमा फर्किने प्रयास गरे पनि इन्टर मायामीको रक्षापंक्ति तोड्न सकेन ।

अन्ततः २–० को जितसँगै अमेरिकी क्लबले प्रतिष्ठित अन्तरमहादेशीय उपाधि आफ्नो नाममा लेखायो ।

क्याम्पियोनेस कप अमेरिकी मेजर लिग सकर (एमएलएस) र मेक्सिकोको लिगा एमएक्सका च्याम्पियनबीच हुने एक खेलको प्रतियोगिता हो । यस प्रतियोगितामा दुवै लिगका विजेताबीच प्रतिस्पर्धा हुने गर्छ ।

उपाधिसँगै मेस्सीको व्यक्तिगत ट्रफी संख्या ४९ पुगेको छ । इन्टर मायामीका लागि यो जित क्लब इतिहासकै महत्वपूर्ण उपलब्धिमध्ये एक बनेको छ भने मेस्सीको नेतृत्वमा टोलीले आफ्नो अन्तर्राष्ट्रिय पहिचान अझ बलियो बनाएको छ ।