निर्वाचन सुरक्षामाथि शीतल निवासमा उच्चस्तरीय छलफल सम्पन्न

काठमाडौं । राष्ट्रपति रामचन्द्र पौडेलको अध्यक्षतामा प्रधानमन्त्री सुशीला कार्की, चारवटै सुरक्षा निकायका प्रमुख र मन्त्रीहरूको सहभागितामा शीतल निवासमा आयोजित महत्वपूर्ण बैठक सकिएको छ ।

राष्ट्रपतिको सचिवालयका अनुसार बैठक आगामी निर्वाचनको समग्र वातावरण र सुरक्षा व्यवस्थामाथि केन्द्रित थियो । छलफलमा प्रधानमन्त्री कार्की, गृहमन्त्री, अन्य केही मन्त्रीहरू तथा नेपाली सेना, सशस्त्र प्रहरी, नेपाल प्रहरी र राष्ट्रिय अनुसन्धान विभागका प्रमुखहरू सहभागी थिए ।

बैठकमा सुरक्षा निकायका प्रमुखहरूले निर्वाचनका लागि आवश्यक तयारी र सुरक्षा व्यवस्थापनका विषयमा सरकारलाई भरोसा दिलाए । उनीहरूले विगतका कठिन परिस्थितिमा पनि सफलतापूर्वक निर्वाचन सम्पन्न गराएका अनुभव प्रस्तुत गर्दै वर्तमान चुनौती सामना गर्न सक्षम रहेको जानकारी गराए ।