उपसभामुखमा श्रम संस्कृति पार्टीको दाबी, महिला उम्मेदवार अघि सार्ने घोषणा

काठमाडौं । प्रतिनिधि सभाको उपसभामुख पदका लागि श्रम संस्कृति पार्टीले पनि प्रतिस्पर्धा गर्ने भएको छ । पार्टी अध्यक्ष तथा संसदीय दलका नेता हर्क साम्पाङले सामाजिक सञ्जालमार्फत पार्टीले उम्मेदवारी दिने जानकारी दिएका हुन् ।

उनले सभामुख निर्विरोध चयन भएकोमा बधाइ दिँदै अब उपसभामुख चयनको प्रक्रियामा पार्टीले महिला उम्मेदवार अघि सार्ने उल्लेख गरेका छन् । साथै उनले नयाँ र पुराना शक्तिबीचको प्रतिस्पर्धामा कस्तो मत परिणाम आउला भन्ने प्रश्न पनि उठाएका छन् ।

उनले लेखेका छन्, ‘सभामुख निर्विरोध चयन हुनु भएकोमा बधाइ दिइसक्यौं । अब उपसभामुख चयनको निर्वाचन हुँदैछ । हामी महिला उम्मेद्वार खडा गर्दैछौं। हेरौं नयाँले नयाँलाई भोटहाल्छ कि उही पुरानालाई । ७ भोट आउँछ कि १८९?’

यसअघि सभामुख पदमा डिपी अर्यालको मात्रै उम्मेदवारी परेकाले उनी निर्विरोध चयन हुने निश्चित भएको छ । उनी राष्ट्रिय स्वतन्त्र पार्टीका तर्फबाट आज (आइतबार) सभामुख पदमा नियुक्त हुनेछन् ।

उपसभामुख पद भने परम्पराअनुसार विपक्षी दललाई दिने अभ्यास रहँदै आएको छ । यसैक्रममा नेपाली कांग्रेस र नेपाल कम्युनिस्ट पार्टीले पनि उम्मेदवारी दिने तयारी गरेका छन् ।