रवीन्द्र ढाँट रोड टु युएफसीको फाइनलमा, बनाए नयाँ नेपाली कीर्तिमान

काठमाडौं । नेपाली मिक्स मार्सल आर्ट्स (एमएमए) फाइटर रवीन्द्र ढाँटले रोड टु युएफसीमा ऐतिहासिक उपलब्धि हासिल गरेका छन् । चीनको साङ्घाईमा भइरहेको रोड टु युएफसी सिजन–५ को सेमिफाइनलमा न्युजिल्यान्डका कासिब मर्डकलाई पराजित गर्दै उनी फाइनलमा प्रवेश गरेका हुन् ।

ढाँट रोड टु युएफसीको फाइनलमा पुग्ने पहिलो नेपाली एमएमए फाइटर बनेका छन् । अब फाइनल जित्न सके उनले विश्वकै प्रतिष्ठित एमएमए संस्था युएफसीसँग व्यावसायिक सम्झौता गर्ने अवसर पाउनेछन् ।

‘बझाङ्गी बाघ’का नामले परिचित ढाँटले बान्टमवेट विधामा अहिलेसम्म ११ वटा व्यावसायिक फाइट खेलेका छन् । उनले १० खेलमा जित निकाल्दा एक खेलमा मात्रै पराजय बेहोरेका छन् । सन् २०२३ मा इस्माइल खानसँग पराजित भएपछि ढाँटले लगातार उत्कृष्ट प्रदर्शन गर्दै आएका छन् ।

उनको पछिल्लो सफल यात्रामा भारतको नोएडामा भएको म्याट्रिक्स फाइट नाइट–१७ को उपाधि पनि महत्वपूर्ण छ । उनले भारतीय फाइटर चुनरेङ कोरेनलाई तेस्रो चरणमा नकआउट गर्दै बान्टमवेट उपाधि जितेका थिए । यससँगै उनी म्याट्रिक्स फाइट नाइटको बान्टमवेट उपाधि जित्ने पहिलो नेपाली खेलाडी बने ।

रोड टु युएफसी सिजन–५ मा पनि ढाँटले प्रभावशाली प्रदर्शन गर्दै आएका छन् । गत मेमा मकाउमा भएको क्वाटरफाइनलमा उनले फिलिपिन्सका किम्बर्ट अलिन्टोजोनलाई हराउँदै सेमिफाइनलको यात्रा तय गरेका थिए ।

क्वाटरफाइनल जितसँगै उनी रोड टु युएफसीको सेमिफाइनलमा पुग्ने पहिलो नेपाली फाइटर बनेका थिए । अहिले सेमिफाइनलमा पनि सफलता हात पार्दै फाइनल पुगेपछि ढाँट नेपाली एमएमएको इतिहासमा अर्को महत्वपूर्ण अध्याय थप्न सफल भएका छन् ।