फुर्केखोलाको वैकल्पिक सडक आज १० घण्टा बन्द

काठमाडौं । धादिङमा पृथ्वी राजमार्गअन्तर्गत फुर्केखोला खण्डमा सञ्चालनमा रहेको वैकल्पिक सडक आज (मंगलबार) १० घण्टाका लागि पूर्ण रूपमा बन्द हुने भएको छ ।

जिल्ला प्रशासन कार्यालय धादिङले सोमबार सूचना जारी गर्दै भदौ २३ गते बिहान ८ बजेदेखि बेलुका ६ बजेसम्म वैकल्पिक सडकमा सबै प्रकारका सवारीसाधनको आवागमन रोक्ने जनाएको हो ।

भदौ १० गते भोटेकोशीमा आएको बाढीले गजुरी गाउँपालिका–२ स्थित फुर्केखोलाको पक्की पुल बगाएपछि ‘परेवाटार–पिपलटार–आदामटार–बेलिनटार–मास्टार’ सडकलाई वैकल्पिक मार्गका रूपमा प्रयोग गरिँदै आएको छ । सो सडकमा थप मर्मत तथा सुधारको काम गर्नुपर्ने भएकाले एक दिनका लागि यातायात बन्द गर्न लागिएको प्रशासनले जनाएको छ ।

सडक बन्द हुने समयमा यात्रु तथा सवारीसाधनलाई ‘धादिङवेशी–सुनौला बजार–भोलें–कोशीखोला–फोसेटार–कल्लेरीटार’ लगायत अन्य उपलब्ध वैकल्पिक मार्ग प्रयोग गर्न प्रशासनले आग्रह गरेको छ ।