एमाले सचिवालयमा ओलीमाथि बढ्दो दबाब, बहुमत नेताले मागे नेतृत्व हस्तान्तरण

काठमाडौं । नेपाल कम्युनिष्ट पार्टी (एमाले) भित्र पार्टी रुपान्तरण र पुनर्गठनको बहस तीव्र बन्दै जाँदा सचिवालयका अधिकांश सदस्य अध्यक्ष केपी शर्मा ओलीको नेतृत्वप्रति असन्तुष्ट देखिएका छन् ।

शुक्रबार चार उपाध्यक्ष र शनिबार महासचिव शंकर पोखरेलसहित तीन उपमहासचिव तथा पाँच सचिवले ओलीले पद छोडेर पार्टी निर्माणमा सहयोग गर्नुपर्ने धारणा राखेका हुन् ।

सचिवालय बैठकमा सचिव महेश बस्नेत मात्र खुला रूपमा ओलीको पक्षमा उभिएका थिए । एक पदाधिकारीका अनुसार शनिबारको छलफलमा पनि “७–१” को अवस्था देखिएको थियो । उनका अनुसार अहिलेको संकटको मुख्य कारण नेतृत्व शैली भएकाले धेरै नेताहरूले ओलीलाई जिम्मेवारी हस्तान्तरण गर्न सुझाव दिएका छन् ।

१९ सदस्यीय सचिवालयमध्ये अध्यक्षसहित ओली पक्षमा बोल्ने संख्या निकै कम रहेको दाबी गर्दै ती पदाधिकारीले अधिकांश सदस्य नेतृत्व परिवर्तनकै पक्षमा उभिएको बताए । पद्मा अर्याल, हिक्मत कार्की, राजन भट्टराईलगायत नेताहरूले वर्तमान अवस्थामा तलसम्म पार्टी प्रभावकारी रूपमा सञ्चालन गर्न कठिन भएको धारणा राखेका थिए ।

यद्यपि अध्यक्ष ओलीले भने आफू निर्वाचित नेतृत्व भएकाले सहज रूपमा पद नछाड्ने अडान दोहोर्‍याएका छन् । उनले बैठकमा उठेका मागहरूको प्रतिवाद गर्दै नेतृत्व निरन्तरताको पक्षमा आफ्नो धारणा राखेका थिए ।

शनिबार बोलेका पाँच उपाध्यक्षमध्ये रामबहादुर थापा ‘बादल’ मात्र ओलीको समर्थनमा देखिएका थिए । उनले संकटको समयमा नेतृत्वको रक्षा गर्नुपर्ने र पार्टी मुख्यालय जोगाउन सबै एकजुट हुनुपर्ने बताएका थिए ।

सचिवालयभित्र अल्पमतमा परेको संकेत देखिएपछि ओलीमाथि पदत्यागको दबाब थपिएको विश्लेषण भइरहेको छ । तर, उनले तत्काल नेतृत्व नछाड्ने स्पष्ट संकेत दिएका छन् ।