मियामीको शानदार पुनरागमन जितमा स्वारेजको ह्याट्रिक, फिलाडेल्फियामाथि ६–४ को शानदार जित

काठमाडौं । इन्टर मियामीले एमएलएस नियमित सिजनअन्तर्गत भएको रोमाञ्चक खेलमा फिलाडेल्फिया युनियनमाथि ६–४ को शानदार पुनरागमन जित निकालेको छ ।

घरेलु मैदानमा सुरुवातमै दुई गोलले पछि परेको मियामीलाई जित दिलाउन लुइस स्वारेजले ह्याट्रिक गर्दा जर्मन बेर्टेरामेले दुई गोल गरे । मिडफिल्डर रोड्रिगो डि पाउलले एक गोल थपे । यस जितसँगै मियामीले नियमित सिजनमा लगातार चौथो जित दर्ता गरेको छ ।

फिलाडेल्फियाले खेलको चौथो र १०औँ मिनेटमा गोल गर्दै २–० को अग्रता बनाएको थियो । त्यसपछि १३औँ मिनेटमा कप्तान लियोनेल मेस्सीको पासमा बेर्टेरामेले गोल गर्दै मियामीलाई खेलमा फर्काउने प्रयास गरे ।

२०औँ मिनेटमा फिलाडेल्फियाले अर्को गोल थप्दै अग्रता ३–१ बनायो । तर २९औँ मिनेटमा सुआरेजले शानदार भलीमार्फत गोल गर्दै अन्तर घटाए ।

४२औँ मिनेटमा फेरि मेस्सीकै उत्कृष्ट पासमा बेर्टेरामेले व्यक्तिगत दोस्रो गोल गर्दै खेल ३–३ को बराबरीमा पुर्‍याए । त्यसको दुई मिनेटपछि सुआरेजले अर्को गोल गर्दै मियामीलाई पहिलो पटक अग्रता दिलाए ।

पहिलो हाफको इन्जुरी समयमा फिलाडेल्फियाले गोल फर्काउँदै खेल ४–४ को बराबरीमा पुर्‍यायो ।

खेलको ८१औँ मिनेटमा बेर्टेरामेको प्रयास बचाउ भएपछि आएको बलमा सुआरेजले गोल गर्दै ह्याट्रिक पूरा गरे र मियामीलाई ५–४ को अग्रता दिलाए ।

इन्जुरी समयको तेस्रो मिनेटमा जन्मदिन मनाइरहेका डि पाउलले सिल्भेट्टीको पासमा गोल गर्दै मियामीको ६–४ को रोमाञ्चक जित सुनिश्चित गरे ।

तर, शानदार जितका बीच कप्तान मेस्सीको फिटनेसले भने समर्थकहरूमा चिन्ता थपेको छ । सन् २०२६ को विश्वकप सुरु हुन केही हप्ता मात्र बाँकी रहँदा अर्जेन्टिनाका कप्तान मेस्सी मैदानमै असहज देखिएपछि फुटबल समर्थकहरू चिन्तित बनेका हुन् ।

आइतबार राति भएको खेलको ७३औँ मिनेटमा मेस्सी अचानक मैदान छाडेर ड्रेसिङ रुमतर्फ लागेका थिए । फ्रि–किक प्रहार गरेलगत्तै उनले आफ्नो देब्रे तिघ्राको माथिल्लो भाग समातेका थिए र प्रशिक्षकलाई असहज भएको संकेत गरेका थिए । यद्यपि, उनी कसैको सहारा बिना आफैँ हिँडेर मैदानबाहिरिएका थिए ।

अर्जेन्टिनाले जुन १६ मा अल्जेरियाविरुद्ध खेल्दै विश्वकप यात्रा सुरु गर्ने तालिका छ । ३८ वर्षीय मेस्सीको सम्भावित मांसपेशी समस्याले अर्जेन्टिनी टोली र उनका समर्थकहरूलाई थप चिन्तित बनाएको छ ।

यद्यपि, गुइलेर्मो होयोसले मेस्सी गम्भीर घाइते नभएको संकेत दिएका छन् । उनका अनुसार मेस्सी अत्यधिक थकित देखिएका थिए र मैदानको अवस्था पनि सहज थिएन । ‘अहिलेसम्म कुनै मेडिकल रिपोर्ट आएको छैन । उनी निकै थकित देखिन्थे । मैदान पनि गाह्रो थियो, त्यसैले जोखिम नलिने निर्णय गरियो,’ प्रशिक्षक होयोसले भने ।

मेस्सीको चोटको चर्चाले ओझेलमा पारे पनि यो खेल अमेरिकी फुटबल इतिहासकै सबैभन्दा रोमाञ्चक खेलमध्ये एक बनेको छ ।