मुलुकले आज नयाँ प्रधानमन्त्री पाउँदै, अपरान्ह शपथ

काठमाडौं । देशको राजनीतिक नेतृत्व आज औपचारिक रूपमा नयाँ चरणमा प्रवेश गर्दैछ । राष्ट्रपति रामचन्द्र पौडेलले आज दिउँसो शीतल निवासमा राष्ट्रिय स्वतन्त्र पार्टीका वरिष्ठ नेता बालेन्द्र शाहलाई प्रधानमन्त्री पद तथा गोपनीयताको शपथ गराउने कार्यक्रम तय गरिएको छ ।

शपथ ग्रहणअघि नै राष्ट्रपति कार्यालयबाट शाहलाई संविधानअनुसार प्रधानमन्त्रीमा नियुक्त गरिएको औपचारिक जानकारी दिइनेछ । नेपालको संविधानको धारा ७६ (१) अनुसार बहुमत प्राप्त दलको नेताको हैसियतमा उनले एकल सरकार गठन गर्न लागेका हुन् ।

राष्ट्रपति कार्यालयका अनुसार शपथ ग्रहण समारोह आज अपराह्न आयोजना हुनेछ, जसमा विभिन्न राजनीतिक दलका शीर्ष नेता, कूटनीतिक नियोगका प्रतिनिधि, नागरिक समाजका व्यक्तित्व तथा उच्च सरकारी अधिकारीहरूको उपस्थिति रहनेछ । प्रधानमन्त्रीसँगै मन्त्रिपरिषद्का सदस्यहरूको पनि शपथ गराउने तयारी गरिएको छ, जसले नयाँ सरकारलाई तत्काल काममा लाग्न सहज बनाउने अपेक्षा गरिएको छ ।

गत फागुन २१ गते सम्पन्न प्रतिनिधिसभा निर्वाचनमा राष्ट्रिय स्वतन्त्र पार्टीले १८२ सिट जित्दै स्पष्ट बहुमत हासिल गरेको थियो । सोही आधारमा पार्टीले बिहीबार बालेन्द्र शाहलाई संसदीय दलको नेता चयन गरेको हो, जसले उनलाई प्रधानमन्त्री बन्ने बाटो खोलेको छ ।

निर्वाचन परिणामअनुसार शाहले झापा क्षेत्र नं. ५ बाट ६८ हजार ३४८ मत प्राप्त गर्दै प्रभावशाली जित हासिल गरेका थिए । यस जितलाई नयाँ राजनीतिक शक्तिको उदयको रूपमा पनि विश्लेषण गरिएको छ ।

यसैबीच, प्रतिनिधिसभाका ज्येष्ठ सदस्य अर्जुननरसिंह केसीले बिहीबार नै नवनिर्वाचित सांसदहरूलाई पद तथा गोपनीयताको शपथ गराइसकेका छन् । केसीले बुधबार नै राष्ट्रपति पौडेलबाट शपथ लिएका थिए । अब सरकार गठनसँगै संसद् सञ्चालन र नीतिगत कामहरूले गति लिने अपेक्षा गरिएको छ ।

नयाँ सरकारबाट राजनीतिक स्थायित्व, सुशासन र विकास निर्माणमा गति आउने आशा नागरिक तहमा बढेको देखिन्छ ।