विशेष महाधिवेशन विवाद चुलिँदा कांग्रेसमा गगन–विश्वसहित नेताहरू पाँच वर्षका लागि निष्कासित

काठमाडौं । नेपाली कांग्रेसभित्र विशेष महाधिवेशनलाई लिएर उत्पन्न विवादले उग्र रूप लिँदा पार्टी संस्थापन पक्षले महामन्त्रीद्वय गगनकुमार थापा र विश्वप्रकाश शर्मासहित केही नेतामाथि कडा कारबाही गरेको छ । सानेपास्थित पार्टी केन्द्रीय कार्यालयमा बसेको केन्द्रीय कार्यसमितिको बैठकले थापा, शर्मा र सहमहामन्त्री फरमुल्ला मन्सुरलगायतलाई पाँच वर्षका लागि पार्टीबाट निष्कासन गर्ने निर्णय गरेको हो ।

केन्द्रीय समितिको निर्णयअनुसार पार्टीको आधिकारिक निर्णयविपरीत विशेष महाधिवेशन आह्वान गरेको आरोपमा उनीहरूमाथि कारबाही गरिएको जनाइएको छ । बैठकले विशेष महाधिवेशनको पक्षमा सक्रिय रहेका नेताहरूलाई आ–आफ्नो जिम्मेवारीमा फर्किन निर्देशनसमेत दिएको छ ।

महामन्त्रीद्वय थापा र शर्माले पार्टीको ५४ प्रतिशत महाधिवेशन प्रतिनिधिले माग गरेको विशेष महाधिवेशनलाई नेतृत्वले बेवास्ता गरेको आरोप लगाउँदै त्यसको आह्वान गरेका थिए । यद्यपि, उनीहरू सहभागी रहेको केन्द्रीय समितिको बैठकले नियमित महाधिवेशन पुसमा सम्भव नभए वैशाखमा गर्ने सहमति गरेको थियो । सो निर्णयमा असहमति जनाउँदै महामन्त्रीद्वयले फरक धारणा राखेका थिए ।

विशेष महाधिवेशनको प्रक्रिया अघि बढाउने क्रममा थापा र शर्माले बन्द सत्रको हलबाट हुने निर्णय नै अन्तिम हुने दाबी गर्दै निर्वाचन समिति गठन गरेका थिए । उक्त समितिमार्फत चुनावी प्रक्रिया अघि बढाइएको थियो, जसलाई संस्थापन पक्षले पार्टी विधानविपरीतको कदम ठहर गरेको छ ।

पार्टी विभाजनको अवस्था आउन नदिन विभिन्न चरणमा नेताहरूबीच छलफल भए पनि सहमति जुट्न सकेन । मंगलबार मात्रै नेताहरूबीच तीन चरणमा संवाद भएको थियो भने आज बिहान महामन्त्रीद्वयले सभापति शेरबहादुर देउवासँग पनि भेटवार्ता गरेका थिए । तर, ती प्रयासबाट पनि निकास ननिस्किएपछि विशेष पक्षका महामन्त्रीद्वयले निर्वाचन समितिलाई प्रक्रिया अघि बढाउन निर्देशन दिएका थिए ।

कांग्रेसभित्रको यो घटनाक्रमले पार्टीको आन्तरिक राजनीतिमा गम्भीर तरंग ल्याएको छ ।