हराएका दुई इटालियन आरोहीको शव पाँच दिनपछि फेला

गोरखा । गोरखाको चुमनुब्री–१ अन्तर्गत पर्ने पाङबारी हिमालमा पाँच दिनदेखि बेपत्ता रहेका दुई इटालियन नागरिकको शव फेला परेको छ । मंगलबार बिहान सो हिमालको पहिलो शिविर (क्याम्प–१) मा ६७ वर्षीय स्तेफानो फरिनातो र ३७ वर्षीय अलेस्सान्द्रो गापुटो मृत अवस्थामा भेटिएका हुन् ।

जिल्ला प्रहरी कार्यालय गोरखाका सूचना अधिकारी डिएसपी राजकुमार श्रेष्ठका अनुसार दुबै जना आरोही हिउँमा पुरिएको अवस्थामा फेला परेका थिए । उनका शवहरू हेलिकोप्टरमार्फत सामागाउँ ल्याइएका छन् ।

गत बुधबारदेखि तीन इटालियन नागरिक र एक नेपाली सहयोगी पाङबारी हिमालबाट फर्कने क्रममा सम्पर्कविहीन भएका थिए । आरोहण असफल भएपछि फर्किने क्रममा परेको बाक्लो हिमपातले बाटो अवरुद्ध हुँदा उनीहरू अलपत्र परेको प्रहरीले जनाएको छ ।

सात हजार पाँच मिटर अग्लो पाङबारी हिमालको आधार शिविरमा रहेका ६५ वर्षीय भेल्टर पेरलिनोलाई आइतबार मात्र हेलिकोप्टरमार्फत उद्धार गरी काठमाडौं पठाइएको थियो ।

यस्तै, बेसक्याम्पमै अड्किएका पेम्बा रेञ्जी शेर्पा, दावा छिरी शेर्पा र पासाङ तामाङलाई पनि उद्धार गरी उपचारका लागि काठमाडौं पठाइएको प्रहरीले जनाएको छ ।

स्थानीय प्रशासनका अनुसार मौसम प्रतिकूल रहेकाले खोज तथा उद्धार कार्यमा ढिलाइ भएको थियो । हिमपात र चिसोका कारण आरोहीहरू हिउँमा पुरिएको अनुमान गरिएको छ ।