रोल्पामा वर्षमान पुनको ऐतिहासिक जित, नेकपाले कायम राख्यो ‘लालकिल्ला’

काठमाडौं । दश वर्षे सशस्त्र विद्रोहको उद्गमस्थल रोल्पामा नेपाल कम्युनिस्ट पार्टी (नेकपा) ले आफ्नो राजनीतिक प्रभाव पुनः प्रमाणित गरेको छ । बदलिँदो राजनीतिक समीकरण र शक्ति सन्तुलनका बीच रोल्पाका मतदाताले फेरि पनि माओवादी पृष्ठभूमिका नेता वर्षमान पुन ‘अनन्त’लाई नै प्रतिनिधिसभामा पठाएका छन् ।

निर्वाचन आयोगले सार्वजनिक गरेको अन्तिम मतपरिणामअनुसार पुनले आफ्ना निकटतम प्रतिद्वन्द्वी नेपाली कांग्रेसका उम्मेदवार सुदनकुमार वलीलाई १५ हजार ४५२ मतको फराकिलो अन्तरले पराजित गरेका हुन् । पुनले कुल २७ हजार ४६० मत प्राप्त गर्दा वलीले १२ हजार ८ मत मात्र प्राप्त गरे ।

त्यस्तै नेकपा एमालेका उम्मेदवार बालराम थापा १० हजार ८९४ मतसहित तेस्रो स्थानमा सीमित भएका छन् ।

यस परिणामसँगै पुन नेकपाभित्र सबैभन्दा ठूलो मतान्तरले जित्ने नेता बनेका छन् । रोल्पाको राजनीतिक मनोविज्ञान र भौगोलिक प्रभावमा आफ्नो पकड अझै बलियो रहेको उनले यो चुनावबाट देखाएका छन् ।

२०७९ को प्रतिनिधिसभा निर्वाचनमा पनि सोही क्षेत्रबाट विजयी भएका पुनले यसपटक अघिल्लो उपलब्धिलाई अझ बलियो बनाएका छन् । सत्ता समीकरण र पार्टीभित्रको शक्ति सन्तुलनमा महत्त्वपूर्ण मानिने उनको यो ‘रेकर्ड’ जितलाई राजनीतिक विश्लेषकहरूले अर्थपूर्ण रूपमा लिएका छन् ।

पूर्व सहयात्री दल एमाले र मुख्य प्रतिस्पर्धी कांग्रेस दुवैलाई उल्लेख्य मतान्तरले पछि पार्दै पुनले रोल्पामा नेकपाको ‘लालकिल्ला’ सुरक्षित राख्न सफल भएका छन् ।