काठमाडौंका विभिन्न क्षेत्रमा १२ दिनसम्म विद्युत् आपूर्ति प्रभावित हुने

काठमाडौं । काठमाडौं उपत्यकामा भूमिगत विद्युत् वितरण प्रणाली सञ्चालनमा ल्याउने तथा आगामी हिउँदमा विद्युतको माग व्यवस्थापन गर्ने तयारीस्वरूप काठमाडौंका विभिन्न क्षेत्रमा विद्युत् आपूर्ति बन्द गरिने भएको छ ।

नेपाल विद्युत् प्राधिकरणका अनुसार कुलेश्वर, बानेश्वर, जोरपाटी र कीर्तिपुर वितरण केन्द्रअन्तर्गतका विभिन्न स्थानमा असोज १५ देखि २६ गतेसम्म आवश्यक प्राविधिक काम गरिनेछ । सो अवधिमा सम्बन्धित क्षेत्रमा बिहान १० बजेदेखि दिउँसो ३ बजेसम्म विद्युत् आपूर्ति रोकेर भूमिगत लाइन सञ्चालन तथा लोड व्यवस्थापनसम्बन्धी काम गरिनेछ ।

निर्धारित तालिकाअनुसार असोज १५ गते सतुंगल–बौथली, १६ गते मच्छेगाउँ दोभान चोक तथा खुसी चोक, १७ गते मुलपानी र १८ गते गर्जुधारा क्षेत्रमा विद्युत् कटौती हुनेछ ।

त्यस्तै, असोज २० गते मुलपानी, २१ गते बलम्बु, २२ गते कोटेश्वर–बालकुमारी, २४ गते सिफल, २५ गते सतुंगल–धौलागिरी आवास क्षेत्र र २६ गते धोबीखोला क्षेत्रमा विद्युत् आपूर्ति प्रभावित हुने प्राधिकरणले जनाएको छ ।

प्राधिकरणका अनुसार मौसम प्रतिकूल भएमा भने तोकिएको समयमा विद्युत् कटौती गरिने छैन ।

काठमाडौं उपत्यकाको विद्युत् वितरण प्रणालीलाई भूमिगत, सुदृढ तथा स्वचालित बनाउने योजनाअनुसार प्राधिकरणले चरणबद्ध रूपमा काम अघि बढाइरहेको छ । यसअन्तर्गत पहिलो चरणमा रत्नपार्क र महाराजगञ्ज वितरण केन्द्रअन्तर्गतका क्षेत्रमा भूमिगत विद्युत् वितरण प्रणाली निर्माण सुरु गरिएको थियो ।

दोस्रो चरणमा काठमाडौंका बाँकी सहरी क्षेत्रमा काम भइरहेको छ भने तेस्रो चरणमा ललितपुर र भक्तपुरका सहरी क्षेत्रलाई समेटिएको छ । चौथो चरणमा पोखरा र भरतपुर महानगरपालिकाका क्षेत्रमा विद्युत् वितरण प्रणाली भूमिगत, सुदृढ तथा स्वचालित बनाउने योजना अघि बढाइएको छ ।

कार्यक्रमअन्तर्गत ३३ केभी, ११ केभी र ४०० भोल्टका विद्युत् लाइन भूमिगत गरिनुका साथै अप्टिकल फाइबरसमेत बिछ्याउने काम हुनेछ । भूमिगत प्रणाली सञ्चालनमा आएपछि विद्युत् आपूर्तिको विश्वसनीयता र सुरक्षा बढ्ने तथा वितरण प्रणालीलाई क्रमशः स्वचालित बनाउन सहज हुने प्राधिकरणको अपेक्षा छ ।