साफ महिला क्लब च्याम्पियनसिपको उपाधि इस्ट बङ्गाललाई, एपिएफ ३–० ले पराजित

काठमान्डु । दक्षिण एसियाली फुटबल महासङ्घ (साफ) द्वारा पहिलो पटक आयोजना गरिएको साफ महिला क्लब च्याम्पियनसिप फुटबल प्रतियोगिताको उपाधि भारतको इस्ट बङ्गालले हात पारेको छ । त्रिपुरेश्वरस्थित दशरथ रङ्गशालामा सम्पन्न फाइनल खेलमा इस्ट बङ्गालले नेपालको एपिएफ क्लबलाई ३–० गोलअन्तरले पराजित गर्दै इतिहास रचेको हो ।

इस्ट बङ्गालको जितमा कप्तान फजिला इक्वापुट नायिका बनिन् । उनले दुई गोल गर्दै टोलीको जित सुनिश्चित गरिन् भने शिल्कीदेवी हनामले एक गोल थपिन् । खेलको २२औँ मिनेटमा कप्तान इक्वापुटले गोल गर्दै इस्ट बङ्गाललाई अग्रता दिलाइन् । नेपालकी गोलकिपर अञ्जना राना मगर र डिफेन्डर गीता रानाबीच तालमेल नमिल्दा आएको मौकालाई उनले सदुपयोग गरिन् ।

खेलको ३५औँ मिनेटमा इस्ट बङ्गालले अग्रता दोब्बर बनायो । सरिता युमनामको कर्नरमा आशा लताले दिएको क्रसमा शिल्कीदेवी हनामले हेडरमार्फत गोल गरिन् । पहिलो हाफमै दुई गोलको अग्रता बनाएको इस्ट बङ्गाल दोस्रो हाफमा पनि आक्रामक देखियो ।

दोस्रो हाफको सुरुआती मिनेटमै कप्तान इक्वापुटले व्यक्तिगत दोस्रो गोल गर्दै टोलीका लागि तेस्रो गोल थपिन् । त्यसपछि दुवै टोलीले प्रयास गरे पनि थप गोल हुन सकेन र इस्ट बङ्गालले ३–० को सहज जित निकाल्दै च्याम्पियनसिपको उपाधि जित्यो ।

गत मङ्सिर १९ गतेदेखि सञ्चालन भएको प्रतियोगितामा पाँच राष्ट्रका क्लबहरूको सहभागिता थियो । फाइनलमा पुगेका एपिएफ र इस्ट बङ्गालसँगै पाकिस्तानको कराँची सिटी एफसी, बङ्गलादेशको नासिर स्पोर्ट्स एकेडेमी र भुटानको ट्रान्सपोर्ट युनाइटेडले प्रतियोगितामा प्रतिस्पर्धा गरेका थिए ।