खोटाङमा तीर्थालु सवार गाडी दुर्घटना, १२ को अवस्था गम्भीर

काठमाडौं । खोटाङको हलेसीबाट फर्किंदै गरेको तीर्थालु सवार गाडी आज बिहान दुर्घटनामा परेको छ ।

प्रहरीका अनुसार जयरामघाट नजिक दुर्घटना भएको विङ्गर गाडी सिराहाबाट तीर्थयात्राका लागि रिजर्भमा हलेसी आएको थियो । गाडीमा १८ जना यात्रु सवार थिए ।

इलाका प्रहरी कार्यालय हलेसी महादेवस्थानका प्रहरी निरीक्षक हेमन्त राईका अनुसार गाडी करिब १५० मिटर तल भिरमा खस्दा गम्भीर क्षति भएको छ । प्रहरी टोलीले घटनास्थलबाट सबै घाइते यात्रुलाई उद्दार गरी उपचारका लागि घुर्मी अस्पताल पुर्‍याएको छ ।

उद्धारमा खटिएका प्रहरी निरीक्षक राईका अनुसार १२ जना यात्रुको अवस्था गम्भीर रहेको छ । अस्पतालमा एम्बुलेन्स सुविधा उपलब्ध नभएकाले घाइतेहरूलाई प्रहरीको गाडीमार्फत नै अस्पताल पुर्‍याइएको हो ।