आज टी–२० विश्वकपमा तीन समूहका तीन रोमाञ्चक खेल हुँदै

काठमाडौं । भारत र श्रीलंकामा संयुक्त रूपमा भइरहेको आईसीसी पुरुष टी–२० विश्वकपमा आज बुधबार पनि तीन फरक समूहका तीन महत्वपूर्ण खेल आयोजना हुँदैछन् ।

बिहान ११ः१५ बजे ग्रुप डी अन्तर्गत अफगानिस्तान र दक्षिण अफ्रिका आमनेसामने हुनेछन् । यसअघि दक्षिण अफ्रिकाले आफ्नो पहिलो खेल जित्दै २ अंक जोडिसकेको छ भने अफगानिस्तान पहिलो खेलमा पराजित हुँदै अंकविहीन अवस्थामा छ । यही समूहमा न्युजिल्यान्ड ४ अंकसहित शीर्ष स्थानमा छ भने अफगानिस्तानसँगै अमेरिका र क्यानडा पनि अहिलेसम्म जितविहीन छन् ।

अपराह्न ३ः१५ बजे ग्रुप बीमा आयरल्यान्ड र अस्ट्रेलियाबीच प्रतिस्पर्धा हुनेछ । आयरल्यान्डले पहिलो खेल गुमाएकाले अंक खाता खोल्न सकेको छैन भने अस्ट्रेलियाले आजबाट विश्वकप यात्रा सुरु गर्दैछ । यस समूहमा जिम्बाब्वे र श्रीलंका समान २–२ अंकसहित क्रमशः पहिलो र दोस्रो स्थानमा छन्, जबकि आयरल्यान्ड र ओमान अंकविहीन छन् ।

साँझ ७ः१५ बजे ग्रुप सी अन्तर्गत इंग्ल्यान्ड र वेस्ट इन्डिजबीच भिडन्त हुनेछ । इंग्ल्यान्डले पहिलो खेलमा नेपाललाई ४ रनले पराजित गर्दै २ अंक जोडेको थियो । वेस्ट इन्डिजले पनि आफ्नो पहिलो खेल जित्दै समान २ अंक बनाएको छ । यो समूहमा दुई खेल खेलेको स्कटल्यान्ड १ जित र १ हारसहित २ अंक जोडेर दोस्रो स्थानमा छ । नेपाल र इटली भने अहिलेसम्म अंकविहीन छन् ।