मुस्ताङमा यो सिजनको पहिलो हिमपात, मुक्तिनाथसम्मको यात्रा रोक्न प्रशासनको आग्रह

मुस्ताङ । हिमाली जिल्ला मुस्ताङमा यस यामको पहिलो हिमपात भएको छ । उपल्लो मुस्ताङका कोरलानाका, लोमान्थाङ गाउँपालिका र मुक्तिनाथ क्षेत्र आज बिहानदेखि बाक्लो हिमपातले ढाकिएका छन् । जिल्ला प्रशासन कार्यालयका अनुसार उपल्लो मुस्ताङका उच्च लेकसँगै तल्लो मुस्ताङका पहाडी भूभागमा पनि वर्षासँगै हिमपात भएको छ ।

प्रमुख जिल्ला अधिकारी विष्णुप्रसाद भुसालले लोमान्थाङ–२ छोसर, कोरलानाका र मुक्तिनाथ क्षेत्रभर बाक्लो हिउँ परेको जानकारी दिए । मुक्तिनाथ विकास समितिका कर्मचारी रविन सुवेदीका अनुसार बिहानैदेखि परिरहेको हिमपातका कारण दर्शनार्थीहरूलाई मन्दिर पुग्न कठिनाइ भएको छ । “मुक्तिनाथ क्षेत्रमा करिब पाँचदेखि छ इन्चसम्म हिउँ जमिसकेको छ,” उनले बताए ।

त्यस्तै, लोघेकर दामोदरकुण्ड गाउँपालिकाको उच्च लेकमा निरन्तर हिमपात भइरहेको र बस्ती नजिकका भागमा वर्षासँगै आंशिक हिउँ परेको गाउँपालिका अध्यक्ष लोप्साङ छोम्फेल विष्टले जानकारी दिए ।

वारागुङ मुक्तिक्षेत्र गाउँपालिकाका खिङ्गा, झोङ, छेङ्गुर र फल्याकलजस्ता उच्च भेगका गाउँमा पनि बाक्लो हिमपात भएको वडाध्यक्ष प्रमेश गुरुङले बताए । हिउँले चिसो बढाए पनि यसले स्याउ र अन्य अन्नबालीका लागि लाभदायक हुने उनले बताए । “हिउँले माटोको भित्री तह सिञ्चित गर्छ, त्यसैले यो किसानका लागि बरदान हो,” गुरुङको भनाइ छ ।

यसैबीच, जिल्ला प्रशासन कार्यालय मुस्ताङले यात्रुहरूलाई कागबेनीदेखि माथि मुक्तिनाथसम्मको यात्रा नगर्न आग्रह गरेको छ। बाक्लो हिमपातका कारण सडक चिप्लो र जोखिमपूर्ण बनेको भन्दै प्रशासनले सावधानी अपनाउन अनुरोध गरेको हो ।

जिल्ला प्रहरी कार्यालयका प्रहरी नायब उपरीक्षक छिरिङ किप्पा लामाका अनुसार जोमसोम–मुक्तिनाथ सडकखण्डअन्तर्गत कालोभिर, खिङ्गा र झारकोट आसपासका क्षेत्रमा हिउँ बाक्लो रूपमा जमेकाले सवारीसाधन लिएर यात्रा नगर्न सल्लाह दिइएको छ ।