प्रतिनिधिसभा निर्वाचनः आज देशभर प्रत्यक्षतर्फ उम्मेदवार मनोनयन

काठमाडौं । आउँदो फागुन २१ गते हुने प्रतिनिधिसभा सदस्य निर्वाचनका लागि प्रत्यक्षतर्फ आज देशभर उम्मेदवार मनोनयन दर्ता हुँदैछ । निर्वाचन आयोगका अनुसार १६५ वटै निर्वाचन क्षेत्रमा निर्वाचन कार्यालय स्थापना भइसकेको छ र मनोनयनका लागि आवश्यक सम्पूर्ण तयारी पूरा गरिएको छ ।

निर्वाचन आयोगले उम्मेदवारी दर्ताका क्रममा कुनै पनि प्रकारको तडकभडक नगर्न आग्रह गर्दै सबै राजनीतिक दल र उम्मेदवारलाई शान्त, अनुशासित र मर्यादित ढंगले निर्वाचन कार्यालय पुग्न अनुरोध गरेको छ । भीडभाड कम गरी प्रक्रिया सहज बनाउने उद्देश्यले आयोगले प्रमुख दल तथा उम्मेदवारका लागि समयसमेत तोकेको जनाएको छ ।

आयोगले यसअघि नै समानुपातिक निर्वाचन प्रणालीतर्फका उम्मेदवारको अन्तिम नामावली सार्वजनिक गरिसकेको छ । कुल २७५ सदस्यीय प्रतिनिधिसभामा समानुपातिकतर्फ ११० जना र प्रत्यक्ष निर्वाचन प्रणालीमार्फत १६५ जना निर्वाचित हुने व्यवस्था रहेको छ ।

गत भदौ २३ र २४ गते भएको जेनजी आन्दोलनपछि निर्वाचन प्रयोजनका लागि गठन भएको अन्तरिम सरकारले निर्वाचनका लागि आवश्यक साधन र स्रोत उपलब्ध गराएको आयोगले जनाएको छ । निर्वाचन सुरक्षाका लागि निर्वाचन प्रहरी छनोट प्रक्रिया पनि सुरु भइसकेको छ ।

अधिकांश राजनीतिक दलले उम्मेदवार छनोटको काम सम्पन्न गरिसकेका छन् भने बाँकी दलले पनि आज बिहानसम्म उम्मेदवार टुंग्याउने तयारी गरेका छन् । नेपाली कांग्रेसले केही निर्वाचन क्षेत्रमा उम्मेदवार छनोट प्रक्रिया जारी रहेको जनाएको छ भने नेपाल कम्युनिष्ट पार्टी (एमाले) ले सबै निर्वाचन क्षेत्रमा उम्मेदवार चयन गरिसकेको जानकारी दिएको छ । एमाले, नेकपा र राष्ट्रिय स्वतन्त्र पार्टीलगायत दलहरूले उम्मेदवारलाई आधिकारिक मनोनयन पत्र प्रदान गरिसकेका छन् ।

आयोगको कार्यसूचीअनुसार आज उम्मेदवार मनोनयन दर्ता हुने भएकाले उम्मेदवारले नागरिकताको प्रमाणपत्रको प्रतिलिपि वा मतदाता परिचयपत्रको प्रतिलिपि अनिवार्य रूपमा साथमा ल्याउनुपर्नेछ । साथै, सम्बन्धित गाउँपालिका वा नगरपालिकाको अन्तिम मतदाता नामावलीमा नाम समावेश भएको प्रमाण पनि आवश्यक पर्ने आयोगले जनाएको छ । अन्य तोकिएका कागजातसमेत लिएर उपस्थित हुन आयोगले आग्रह गरेको छ ।

निर्वाचन आयोगले आवश्यक सबै तयारी पूरा भइसकेको भन्दै आज देशभर उत्साहपूर्ण वातावरणमा उम्मेदवार मनोनयन प्रक्रिया अघि बढ्ने विश्वास व्यक्त गरेको छ ।