आजदेखि डिलरमार्फत नियमित रूपमा एलपी ग्यास बिक्री हुने

काठमाडौं । आजदेखि खाना पकाउने एलपी ग्यासको बिक्री वितरण सम्बन्धित उद्योगका आधिकारिक डिलरमार्फत नियमित प्रक्रियाअनुसार हुने भएको छ ।

नेपाल आयल निगमले आइतबार सूचना जारी गर्दै भदौ १ गते सोमबारदेखि उद्योगहरूले नियुक्त गरेका बिक्रेतामार्फत ग्यास बिक्रीको व्यवस्था मिलाइएको जनाएको हो । निगमले ग्यास आवश्यक पर्ने उपभोक्तालाई आफूलाई पायक पर्ने आधिकारिक बिक्रेतासँग सम्पर्क गरी ग्यास खरिद गर्न आग्रह गरेको छ ।

ग्यास वितरणलाई व्यवस्थित र प्रभावकारी बनाउन निगमले उद्योग तथा बिक्रेतालाई दैनिक बिक्रीको विवरण अनिवार्य रूपमा उपलब्ध गराउन निर्देशन दिएको छ । उद्योगहरूले दैनिक बिक्री गर्ने बिक्रेता तथा वितरकको नाम, ठेगाना, सम्पर्क नम्बर र सिलिण्डरको संख्यासहितको विवरण बिहान ९ः०० बजेसम्म निगममा पठाउनुपर्नेछ ।

त्यस्तै, बिक्रेता तथा वितरकले बिक्री गरेको ग्यासको परिमाण, उपभोक्ताको नाम र सम्पर्क नम्बरसहितको विवरण तयार गरी सम्बन्धित उद्योगलाई उपलब्ध गराउनुपर्नेछ । उद्योगहरूले उक्त विवरण सोही दिन निगममा पठाउनुपर्ने व्यवस्था गरिएको छ ।

निगमका अनुसार ग्यास वितरण गर्दा अत्यावश्यक घरेलु प्रयोजनका उपभोक्तालाई प्राथमिकता दिनुपर्नेछ । ग्यास ढुवानी तथा वितरणमा सुरक्षा व्यवस्थाका लागि सम्बन्धित जिल्ला प्रशासन कार्यालयसँग समन्वय गर्न गृह मन्त्रालयमार्फत अनुरोधसमेत गरिएको छ ।

ग्यास वितरणको अनुगमनका लागि वाणिज्य, आपूर्ति तथा उपभोक्ता संरक्षण विभाग र निगमबाट खटिएका जनशक्तिको संयुक्त टोली परिचालन गरिने निगमले जनाएको छ ।

नजिकको बिक्रेताबाट कुनै कारणले ग्यास प्राप्त गर्न नसकेका तथा तत्काल ग्यास आवश्यक भएका उपभोक्ताले निगमको क्विक रेस्पोन्स टिम (क्यूआरटी) का मोबाइल नम्बर ९८५१४५५१२४ र ९८५१४५५१२८ मा सम्पर्क गर्न सक्नेछन् ।