रुपन्देही कारागारले लामिछानेको बन्दी कोठामा प्लाइउड हटाएर जाली राख्यो

रुपन्देही । रुपन्देही कारागार कार्यालयले संगठित सहकारी ठगी मुद्दामा पुर्पक्षका लागि थुनामा रहेका राष्ट्रिय स्वतन्त्र पार्टी ९रास्वपा०का सभापति रवि लामिछाने बस्ने कोठाको झ्यालमा रहेको प्लाइउड हटाएर जाली राखिएको जनाएको छ ।

हालै सञ्चारमाध्यममा बन्दीहरूलाई दिइने सुविधा र व्यवस्थाबारे समाचार आइरहेकोप्रति ध्यानाकर्षण भएको भन्दै कारागार प्रशासनले बिहीबार सूचना जारी गरेको हो ।

कारागारका प्रशासक सुरेश भण्डारीका अनुसार लामिछानेको बन्दी कोठामा सुरुदेखि नै सुरक्षा कारण छुट्टै व्यवस्था गरिएको थियो । सो कोठामा छुट्टै शौचालय पनि रहेको र सुरुमा झ्यालमा प्लाइउड राखिएको भए पनि अहिले त्यसलाई हटाएर जाली जडान गरिएको उनले बताए ।

भण्डारीका अनुसार लामिछानेलाई प्रारम्भदेखि नै टेलिफोन प्रयोग र भेटघाटको सुविधा उपलब्ध गराइएको छ ।

रुपन्देही कारागारको क्षमता २५० जनाको भए पनि हाल त्यहाँ ६४० कैदीबन्दी रहेका छन् । क्षमताभन्दा तीन गुणा बढी कैदीबन्दी भए पनि उपलब्ध स्रोत साधन प्रयोग गरेर कानुनअनुसार सुविधा दिन प्रयास भइरहेको कारागार प्रशासनले जनाएको छ ।