हायू समाजको आपत्तिः “पूर्वाग्राही टिप्पणी समुदायप्रति अपमान”

काठमाडौं । सिन्धुलीकी उर्मिला हायू र उनको परिवारबारे गरिएको आधारहीन टिप्पणीप्रति हायू समाज नेपालले गम्भीर आपत्ति जनाएको छ ।

मंगलबार एक विज्ञप्ति जारी गर्दै समाजले सम्पर्कविहीन भनिएको परिवार पोखरा महानगरपालिका–३०, गगनगौडामा सकुशल भेटिएको जानकारी दिएको छ । गोलन्जोर गाउँपालिका–६, छेत्पाका उनीहरू केही समयअघि सम्पर्कमा नआएपछि अनेक अडकल र टिप्पणी सार्वजनिक भएका थिए ।

हायू समाज नेपालका अध्यक्ष लक्ष्मण हायूले जारी गरेको विज्ञप्तिमा भनिएको छ, “केही सञ्चारमाध्यम र सामाजिक सञ्जालमा गरिएको तथ्यहीन प्रचारले न केवल पीडित परिवारलाई हैरान बनायो, पूरै हायू समुदायको गरिमामाथि नै आघात पुर्‍यायो ।”

१६ सदस्यीय उक्त परिवार पोखरामा भेटिएपछि प्रहरीले उनीहरूलाई सोधपुछ गर्दा ‘कामको सिलसिलामा’ आएको परिवारको भनाइ छ ।

हायू समाजले परिवारलाई सामाजिक सुरक्षा भत्तासँग जोडेर गरिएको टिप्पणीलाई ‘पूर्वाग्रही’ भन्दै भर्त्सना गरेको छ । साथै, समाजले संघीय, प्रदेश र स्थानीय सरकारलाई परिवारको पुनर्स्थापना तथा आवश्यक सहयोगमा चासो दिन आग्रह गरेको छ ।

“अनावश्यक हल्ला र भ्रामक टिप्पणीको सट्टा समुदायलाई सहानुभूति र समझदारीपूर्वक बुझ्नुपर्छ,” विज्ञप्तिमा भनिएको छ ।