सत्ता समीकरण फेरिएसँगै कोशी सरकारबाट कांग्रेस बाहिरियो

काठमाडौं । कोशी प्रदेशमा सत्ता समीकरण परिवर्तन भएसँगै नेपाली कांग्रेस सरकारबाट बाहिरिएको छ । बुधबार कांग्रेसबाट प्रदेश सरकारमा सहभागी मन्त्रीहरूले राजीनामा दिएका छन् ।

कोशी प्रदेश सांसद एवम् भौतिक पूर्वाधार विकास मन्त्री प्रदीप कुमार सुनुवारले प्रदेश सरकारमा रहेका कांग्रेसका सबै मन्त्रीले बुधबार राजीनामा दिएको जानकारी दिए ।

नेकपा एमाले र नेपाली कम्युनिस्ट पार्टी (नेकपा) बीच नयाँ सत्ता समीकरण बनेपछि कांग्रेसका मन्त्रीहरूलाई सरकारबाट बाहिरिन दबाब परेको थियो । नयाँ गठबन्धनअनुसार प्रदेश सरकार पुनर्गठनको तयारी भएपछि कांग्रेसका मन्त्रीहरूले राजीनामा दिएका हुन् ।

कोशी प्रदेश सरकारमा कांग्रेसका तर्फबाट भौतिक पूर्वाधार विकासमन्त्री प्रदीप सुनुवार, स्वास्थ्यमन्त्री मानबहादुर लिम्बू, उद्योग, कृषि तथा सहकारीमन्त्री इस्राइल मन्सुरी, पर्यटन, वन तथा वातावरणमन्त्री भीम पराजुली र भौतिक पूर्वाधार विकास राज्यमन्त्री शोभा चेम्जोङ सहभागी थिए ।

कांग्रेस सरकारबाट बाहिरिएसँगै अब नेकपा सरकारमा सहभागी हुने बाटो खुलेको छ ।