चार्ज गरेको मोबाइल झिक्ने क्रममा करेन्ट लाग्दा महिलाको मृत्यु

ओखलढुंगा (खिजीदेम्बा) । चार्ज गरेको मोबाइल झिक्ने क्रममा करेन्ट लागेर एक महिलाको ज्यान गएको छ । खिजीदेम्बा गाउँपालिका–३ को तनुवामा मंगलबार दिउँसो करिब १ बजे भएको घटनामा ४८ वर्षीया विष्णुमाया सुनुवारको घटनास्थलमै मृत्यु भएको स्थानीयले जनाएका छन् ।

सुनुवार आफ्नै घरमा मोबाइल चार्जरबाट फोन निकाल्ने क्रममा करेन्टले समात्दा चिच्याएको आवाज सुनिएको र परिवारका सदस्य दौडिएर हेर्दा उनी भुइँमा लडेको अवस्थामा पाइएकी थिइन् । तत्काल उद्धार प्रयास गरिएको भए पनि उनको त्यतिबेलासम्म मृत्यु भइसकेको थियो ।

घटना पछि इलाका प्रहरी कार्यालय खिजीफलाटेले घटनास्थलमा पुगेर अनुसन्धान थालेको छ ।

स्थानीय प्रतिनिधिहरूले गाउँमा विद्युत सुरक्षाबारे चेतना अभाव भएको भन्दै घटनाले ठूलो शिक्षा दिएको बताएका छन् ।

विद्युत सुरक्षाको सामान्य उपाय नअपनाउँदा पनि ज्यान जान सक्ने यस्ता घटनाहरूले गाउँ–घरमा सचेतना बढाउनु आवश्यक देखिएको छ ।