एमाले ओखलढुंगाको नेतृत्व नेकपामा समाहित, ३८ नेता–कार्यकर्ताद्वारा सामूहिक पार्टी परित्याग

काठमाडौं । ओखलढुंगामा नेकपा (एमाले) भित्रको आन्तरिक विवाद उत्कर्षमा पुगेपछि जिल्ला नेतृत्वसहित ३८ जना नेता–कार्यकर्ता नेपाली कम्युनिष्ट पार्टी (नेकपा) मा प्रवेश गरेका छन् । शुक्रबार आयोजित कार्यक्रममा नेकपाका संयोजक पुष्पकमल दाहाल ‘प्रचण्ड’ र सहसंयोजक माधवकुमार नेपालले उनीहरूलाई पार्टीमा स्वागत गरेका हुन् ।

एमाले ओखलढुंगा जिल्ला कमिटीले पार्टी नेतृत्वको कार्यशैलीप्रति गम्भीर असन्तुष्टि जनाउँदै सामूहिक रूपमा पार्टी परित्याग गर्ने निर्णय गरेको थियो । जिल्ला कमिटी अध्यक्ष ज्ञानबहादुर खड्का (जीबी) को नेतृत्वमा पदाधिकारी र सदस्यहरूले शुक्रबारदेखि लागू हुने गरी पार्टीका सम्पूर्ण जिम्मेवारीबाट राजीनामा दिएका हुन् ।

उनीहरूले पार्टी अध्यक्ष केपी शर्मा ओलीको स्वेच्छाचारी र अहङ्कारी नेतृत्व शैलीका कारण पार्टीभित्र रहन नसकिने अवस्था सिर्जना भएको बताएका छन् । विशेष गरी आगामी निर्वाचनका लागि उम्मेदवार सिफारिस गर्दा जिल्ला कमिटीको निर्णय र कार्यकर्ताको भावनालाई बेवास्ता गरिएको आरोप उनीहरूको छ ।

जिल्लाबाट सर्वसम्मत रूपमा सिफारिस गरिएका नामलाई लत्याउँदै केन्द्रले व्यक्तिगत निकटताका आधारमा अस्मिता थापालाई उम्मेदवार बनाएपछि विवाद चर्किएको बताइएको छ । अध्यक्ष खड्काका अनुसार यसले स्थानीय मतदाता र कार्यकर्ताको अपमान हुनुका साथै पार्टीभित्र लोकतान्त्रिक अभ्यास कमजोर भएको सन्देश दिएको छ ।

राजीनामा दिनेहरूमा उपाध्यक्ष कमलप्रसाद न्यौपाने, सचिव अशोक थापा, उपसचिव राजिव कटवाल, प्रदेश कमिटी सदस्यहरू उमेश कार्की, इच्छाकुमारी गुरुङ र सुरेश थापा रहेका छन् । साथै लेखा कमिटी अध्यक्ष मोहन ढकाल, युवा संघका जिल्ला अध्यक्ष सुदिप कार्की, अनेरास्ववियु जिल्ला अध्यक्ष विवेक तामाङ र खेलकुद महासंघ जिल्ला अध्यक्ष राजकुमार राईले पनि पदबाट राजीनामा दिएका छन् ।

नेतृत्वले संवाद र सहमतिभन्दा निषेधको राजनीति अपनाएको, पार्टीलाई सीमित व्यक्तिको घेराभित्र राखिएको र विधि विपरीत समानान्तर गतिविधि सञ्चालन गरिएको उनीहरूको आरोप छ । यस्तो संगठनविरोधी निर्णयको जिम्मेवारी लिन नसक्ने भन्दै सामूहिक राजीनामा दिइएको उनीहरूले स्पष्ट पारेका छन् ।