नेपाली कम्युनिस्ट पार्टीको एकता राष्ट्रिय सम्मेलन सुरु

काठमाडौं । नेपाली कम्युनिस्ट पार्टीको एकता राष्ट्रिय सम्मेलन बुधबार राजधानीको भृकुटीमण्डपमा सुरु भएको छ । नेकपा (माओवादी केन्द्र), नेकपा (एकीकृत समाजवादी) लगायतका १० वटा कम्युनिस्ट घटकबीच पार्टी एकता घोषणा गर्ने उद्देश्यले सम्मेलन आयोजना गरिएको हो ।

सम्मेलनको औपचारिक सुरुवात माओवादी केन्द्रका अध्यक्ष पुष्पकमल दाहाल ‘प्रचण्ड’, एकीकृत समाजवादीका अध्यक्ष माधवकुमार नेपालसहित सबै घटकका शीर्ष नेताहरूले संयुक्त रूपमा रिमोट थिचेर गरेका हुन् ।

नेता वर्षमान पुनका अनुसार सम्मेलनमा पार्टीको विधान पारित गर्ने, केन्द्रीय समिति गठन गर्ने र निर्वाचन आयोगमा नयाँ दल दर्ताका लागि आवश्यक निर्णय लिने एजेन्डा तय गरिएको छ ।

सम्मेलनमा माओवादी केन्द्र, एकीकृत समाजवादीसहितका नौ वाम घटकका शीर्ष नेताहरू सहभागी छन् । त्यसमध्ये पूर्वप्रधानमन्त्री झलनाथ खनाल पनि आजको सम्मेलनमा उपस्थित भएका छन् ।

खनाल यसअघि एकता प्रक्रियामा सहभागी नहुने भन्दै छुट्टै अभियानमा लागेका थिए । तर, बुधबार बिहान माओवादी केन्द्रका संयोजक प्रचण्डसँग भएको वार्तापछि उनी एकता प्रक्रियामा सहभागी हुन सहमत भएका हुन् ।