ईश्वरीदेवी न्यौपाने सर्वसम्मत रूपमा राज्य व्यवस्था समितिको सभापति

काठमाडौं । नेपाली कांग्रेस सांसद ईश्वरीदेवी न्यौपाने प्रतिनिधि सभा अन्तर्गतको राज्य व्यवस्था तथा सुशासन समितिको सभापतिमा निर्विरोध चयन भएकी छिन् ।

मंगलबार दिउँसो १ बजेदेखि ४ बजेसम्म उम्मेदवारी दर्ताको समय तोकिएको थियो । तर सो अवधिभित्र न्यौपानेकै मात्र नाम दर्ता भएपछि उनी सर्वसम्मत सभापति बन्ने निश्चित भएको हो । औपचारिक घोषणा भने बुधबार दिउँसो ३ बजे बस्ने समितिको बैठकमार्फत हुने प्रतिनिधि सभा सचिवालयले जनाएको छ ।

यसअघि समितिका तत्कालीन सभापति रामहरि खतिवडाले ‘कुलिङ पिरियड’ विवादका कारण पद छोडेका थिए । त्यसपछि रिक्त पदमा नयाँ सभापति चयन प्रक्रिया अघि बढाइएको हो । न्यौपानेको उम्मेदवारी दर्ता गर्दा प्रस्तावकमा रामहरि खतिवडा स्वयं रहेका थिए भने समर्थकमा एमाले सांसद कृष्णगोपाल श्रेष्ठ थिए ।

न्यौपाने यसअघि संसदीय सुनुवाइ समितिको सभापतिमा कार्यरत थिइन् । तर कांग्रेसले उनलाई राज्य व्यवस्था समितिको सभापति बनाउने निर्णय गरेपछि उनले मंगलबारै सभामुखसमक्ष राजीनामा दिँदै सो पदमा उम्मेदवारी दिएकी थिइन् ।