नेप्सेमा भारी गिरावट, जेनजी आन्दोलनपछि खुलेको पहिलो कारोबार दिनमै नकारात्मक सर्किट

काठमाडौं । जेनजी आन्दोलनपछि पुनः खुलेको नेप्से परिसूचकमा भारी गिरावट आएको छ । सुशीला कार्कीको नेतृत्वमा बनेको अन्तरिम सरकारपछिको पहिलो कारोबार दिन नेप्सेमा नकारात्मक सर्किट लाग्दा कारोबार २० मिनेटका लागि स्थगित गरिएको हो ।

प्रि–ओपन सेसनमै बजार कमजोर देखिएको थियो । यस अवधिमा परिसूचक ३४.२७ अंकले घटेर २६३७.९७ विन्दुमा पुगेको थियो । नियमित कारोबार सुरु भएको दुई मिनेटमै भने बजार थप १०७.०४ अंकले झर्दै नकारात्मक सर्किटमा प्रवेश गर्‍यो ।

गत भदौ २३ गते नेप्से ३५.९९ अंकले घटेर २६७२.२५ विन्दुमा बन्द भएको थियो । सात दिनपछि खुलेको बजार अझै कमजोर देखिँदा परिसूचक २५६५.२१ विन्दुमा झरेको छ ।

लगानीकर्तामा राजनीतिक अनिश्चितता र आन्दोलनको प्रभावले मनोबल कमजोर पारेको विश्लेषण गरिएको छ । बजार विश्लेषकहरूले निकट भविष्यमा स्थायित्व नआएसम्म नेप्सेमा उच्च उतारचढाव रहने अनुमान गरेका छन् ।