बराबरीसँगै कोलम्बिया र पोर्चुगल अन्तिम ३२ मा, रोनाल्डो प्रभावहीन

काठमाडौं । फिफा विश्वकप–२०२६ को समूह ‘के’ अन्तर्गत शनिबार मियामी स्टेडियममा भएको कोलम्बिया र पोर्चुगलबीचको प्रतिस्पर्धात्मक खेल गोलरहित बराबरीमा सकिएको छ । दुबै टोलीले ०–० को नतिजासँगै नकआउट चरण अर्थात् अन्तिम ३२ मा स्थान सुरक्षित गरेका छन् ।

समूह विजेता बनेको कोलम्बियाले अब आगामी शुक्रबार कान्सास सिटीमा घानासँग प्रतिस्पर्धा गर्नेछ । यता, समूहको शीर्ष स्थानका लागि जित आवश्यक रहेको पोर्चुगल बराबरीमै रोकिएपछि उपविजेतामा सीमित भयो । पोर्चुगलले बिहीबार टोरोन्टोमा क्रोएसियाको सामना गर्नेछ ।

पहेंलो जर्सीमा सजिएका हजारौँ समर्थकको उत्साहपूर्ण उपस्थितिमा कोलम्बियाले खेलको सुरुदेखि नै आक्रामक प्रदर्शन गर्‍यो । पहिलो मिनेटमै जोन कोर्डोबाको हेडर बारमाथिबाट बाहिरिएको थियो भने १७औँ मिनेटमा जोन आरियासको उत्कृष्ट पासमा आएको कोर्डोबाको शक्तिशाली प्रहारलाई पोर्चुगली गोलकिपर डियोगो कोस्टाले शानदार बचाउ गरे ।

२२औँ मिनेटमा आरियासकै अर्को प्रयास गोललाइन पार गर्नै लाग्दा रुबेन नेभेसले समयमै क्लियर गर्दै पोर्चुगललाई संकटबाट जोगाए । पहिलो हाफमा कोलम्बियाले खेलमा पकड बनाए पनि पोर्चुगलले पनि केही अवसर सिर्जना गर्‍यो । ३९औँ मिनेटमा ब्रुनो फर्नान्डेसको प्रहारलाई कामिलो भार्गासले उत्कृष्ट रूपमा रोके भने त्यसको केहीबेरपछि जोआओ फेलिक्सको भली लक्ष्यभन्दा माथिबाट बाहिरियो ।

दोस्रो हाफमा पोर्चुगलले आक्रमणको गति बढाए पनि स्पष्ट अवसर भने कोलम्बियाले नै सिर्जना गरिरह्यो । आरियासको पासमा वैकल्पिक खेलाडी रिचार्ड रियोसको प्रहार लक्ष्यभन्दा बाहिरियो भने आरियासको घुमाउरो प्रहारलाई फेरि एकपटक डियोगो कोस्टाले बचाए ।

७३औँ मिनेटपछि जेम्स रोड्रिगेज र जोन आरियास मैदानबाट बाहिरिए पनि कोलम्बियाको आक्रमण रोकिएन । खेल सकिन एक मिनेट बाँकी रहँदा डाभिन्सन सान्चेजले हेडमार्फत गोल गरेका थिए । तर भिडियो सहायक रेफ्री (भिएआर) ले अत्यन्त झिनो अफसाइड देखाउँदै गोल रद्द गरिदियो ।

इन्जुरी समयमा पोर्चुगलका राफाएल लियाओले निर्णायक गोल गर्ने अवसर पाए पनि उनको प्रहार गोलपोस्ट नजिकैबाट बाहिरिएपछि खेल गोलरहित बराबरीमा टुङ्गियो ।

६४ हजार ४ सय ७८ दर्शकको उपस्थितिमा भएको खेलमा पोर्चुगलका कप्तान क्रिस्टियानो रोनाल्डो अपेक्षाअनुसार चम्किन सकेनन् । दर्शकबाट लगातार हुटिङ खेपेका उनले खेलभरि पर्याप्त बल नपाउँदा प्रभाव जमाउन सकेनन् । उनले गरेको लक्ष्यतर्फको एकमात्र प्रहार लामो दूरीको फ्रिकिक थियो, जसलाई कोलम्बियाली गोलकिपरले सहजै नियन्त्रण गरेका थिए ।