एमाले विधान महाधिवेशनः नौ समूहमा प्रतिवेदन छलफल सुरु

ललितपुर । गोदावरीमा जारी नेकपा (एमाले) विधान महाधिवेशनमा नौ समूह बनाएर प्रतिवेदनमाथि छलफल सुरु गरिएको छ ।

यसअघि १० समूह बनाउने तयारी भए पनि अन्ततः नौ समूहमै छलफल थालिएको हो । पहिलो दिन अध्यक्ष केपी शर्मा ओलीले राजनीतिक प्रतिवेदन, उपाध्यक्ष विष्णु पौडेलले विधान संशोधन प्रस्ताव, महासचिव शंकर पोखरेलले संगठनात्मक प्रतिवेदन र सल्लाहकार परिषद् संयोजक अमृत बोहोराले प्रतिवेदन प्रस्तुत गरेका थिए ।

‘निर्णायक राष्ट्रिय शक्ति निर्माण हाम्रो संकल्प, समृद्ध नेपाल, सुखी नेपाली हाम्रो गन्तव्य’ मूल नाराका साथ भइरहेको विधान महाधिवेशनमा २ हजार २६ जना प्रतिनिधि र ३१५ आयोजक सदस्य गरी कुल २ हजार ३४१ जना सहभागी छन् ।

महाधिवेशन आइतबारसम्म सम्पन्न गर्ने तयारी एमालेले गरेको छ ।

तर, यसपटक पार्टीका पूर्वउपाध्यक्षसमेत रहेकी पूर्वराष्ट्रपति विद्यादेवी भण्डारीलाई सहभागी हुन अनुमति दिइएन । अध्यक्ष ओलीले उनको सदस्यता नै रद्द गरेपछि भण्डारीपक्षीय नेताहरू रुष्ट बनेका छन् । उनीहरूले फरक मत महाधिवेशनमा पेस गर्ने तयारी पनि गरेका छन् ।

भण्डारीले प्रतिनिधिहरूलाई चिठी बाँडेर आफ्नो धारणा समेत सार्वजनिक गरेकी छिन् ।