नवगठित नेकपाको १३८ सदस्यीय केन्द्रीय समिति सार्वजनिक, शीर्ष नेतादेखि नयाँ नामसम्म समावेश

काठमाडौं । दसवटा वामपन्थी दलको एकीकरणपछि बनेको नवगठित नेपाली कम्युनिस्ट पार्टी (नेकपा) को १३८ सदस्यीय केन्द्रीय समितिको सूची बाहिरिएको छ । कात्तिक १९ गते माओवादी केन्द्र, एकीकृत समाजवादीसहितका दलबीच घोषणा गरिएको एकतापछि एउटै संरचना निर्माणका क्रममा तयार पारिएको नामावली निर्वाचन आयोगमा पेस गरिएको हो ।

पार्टी संयोजकमा पूर्व माओवादी अध्यक्ष पुष्पकमल दाहाल ‘प्रचण्ड’ तथा सह–संयोजकमा पूर्व एकीकृत समाजवादी अध्यक्ष माधवकुमार नेपाल तोकिएका छन् । आयोगमा पठाइएको नामावलीमा तेस्रो नम्बरमा झलनाथ खनाल, चौंथोमा बामदेव गौतम, पाँचौँमा नारायणकाजी श्रेष्ठ, छैटौँमा अग्निप्रसाद सापकोटा, सातौँमा कृष्णबहादुर महरा, आठौँमा जगन्नाथ खतिवडा, नवौँमा जयन्तीदेवी राई र दशौँमा डा. बेदुराम भुसाल रहेका छन् ।

नामावलीको अन्तिम अर्थात १३८औँ स्थानमा माओवादी नेतृ तथा प्रचण्डकी बुहारी विना मगरको नाम रहेको छ । समग्र समितिमा करिब ३३ प्रतिशत महिलाको प्रतिनिधित्व रहने व्यवस्था गरिएको पार्टी स्रोतले जनाएको छ ।